বিভিন্ন ধৰণৰ সমাজসেৱা মূলক কাম-কাজৰ সৈতে জড়িত হোজাইৰ এটা আগশাৰীৰ স্বেচ্ছাসেৱী সংগঠন হৈছে মাৰকাজুল মা’আৰিফ।
এই বাৰ এই সংগঠনে মুছলিম ধৰ্মাৱলম্বী লোকৰ আজিৰে পৰা আৰম্ভ হোৱা পবিত্ৰ ৰমজান মাহ উপলক্ষে মুছলিম ধৰ্মৰ দৰিদ্ৰ পৰিয়ালসমূহৰ মাজত ‘ৰমজান সাহায্য’(RAMADAN AID) হিচাপে খাদ্যৰ টোপোলা বিতৰণ কাৰ্যসূচী আৰম্ভ কৰিছে।
দুখীয়া তথা ৰোজা ৰখা পৰিয়ালসমূহক বিনামূলীয়া খাদ্যৰ টোপোলা বিলোৱা হয়।
সংগঠনটোৰ ফালৰ পৰা প্ৰকাশিত এক প্ৰেছ বিজ্ঞপ্তি অনুসৰি স্বেচ্ছাসেৱী সংগঠনটোৰ সভাপতি চামচুল হ’ক চৌধুৰী আৰু সম্পাদক খালিলুৰ ৰহমানৰ তত্বাৱধানত এই কাৰ্যসূচী আৰম্ভ কৰা হয়।
বিজ্ঞপ্তিটোৰ মতে তেওঁলোকে গ্ৰহণ কৰা এই পদক্ষেপৰ জৰিয়তে কোকৰাঝাৰত ৫০০০, গোলাগঞ্জত ১০০০, গোৱালপাৰাত ২০০০, জলেশ্বৰত ১০০০, নগাঁও আৰু মৰিগাঁৱত ৭০০০, লখিমপুৰ, নাওবৈচা, শিপৰাঝাৰ, দলগাঁও, বালুনি, ডিব্ৰুগড়, শিৱসাগৰ, তিনিচুকীয়া আৰু গোলাঘাটত ৬০০০ আৰু হোজাইত ৫০০০ খাদ্যৰ টোপোলা বিলোৱা হ’ব।
এই সম্পৰ্কত সম্পাদক খালিলুৰ ৰহমানে কয়, ‘আমাৰ উদ্দেশ্য হৈছে সঁচা অৰ্থত দুখীয়া লোকসকলক খাদ্য সামগ্ৰী যোগান ধৰা আৰু সেই অনুযায়ী আমাৰ দলে খাদ্য সামগ্ৰী বিতৰণ কৰি আছে।
