চৰকাৰীভাৱে মাচুল সম্পূৰ্ণ ৰেহাই দিয়াৰ পাছতো অবৈধভাৱে ভৰ্তিমাচুল সংগ্ৰহ কৰাৰ অভিযোগ উত্থাপন হৈছে ধুবুৰীৰ হুদুৰহাট ধৰ্মশালা উচ্চতৰ মাধ্যমিক বিদ্যালয়ত। বিদ্যালয়খনৰ অধ্যক্ষ আবু আনিছে দ্বাদশ শ্ৰেণীৰ নামভৰ্তিৰ বাবদ প্ৰতিজন শিক্ষাৰ্থীৰ পৰা ২০০ টকাকৈ মাচুল সংগ্ৰহ কৰাক কেন্দ্ৰ কৰি আবু চায়েদ নামৰ এজন ছাত্ৰই কৰা এজাহাৰৰ ভিত্তিত মঙলবাৰে ধুবুৰী আৰক্ষীয়ে আটক কৰে বিদ্যালয়খনৰ অধ্যক্ষগৰাকীক।
উল্লেখ্য যে একেখন বিদ্যালয়ৰ পৰা উচ্চতৰ মাধ্যমিক প্ৰথম বৰ্ষ উত্তীৰ্ণ হৈ আবু চায়েদ নামৰ ছাত্ৰজনে দ্বিতীয় বৰ্ষত নামভৰ্তি কৰিবলৈ আহে। কিন্তু নামভৰ্তিৰ বাবদ বিদ্যালয়খনৰ অধ্যক্ষ আবু আনিছে ছাত্ৰজনৰ পৰা ২০০ টকা বিছাৰে। ছাত্ৰজনে এই ধন দিবলৈ অমান্তি হোৱাৰ লগতে উক্ত ধনৰাশিৰ বিনিময়ত ৰছিদ বিছাৰে। ৰছিদ বিচৰা কাৰ্যত প্ৰধান শিক্ষকৰ লগত বাক বিতণ্ডাত লিপ্ত হয় ছাত্ৰজন। প্ৰধান শিক্ষকজনে এনে কাৰ্যত ক্ষুন্ন হৈ ছাত্ৰজনক প্ৰহাৰ কৰাৰো অভিযোগ উত্থাপিত হয়।
ইয়াৰ পাছতে বিদ্যালয়খনৰ ছাত্ৰ-ছাত্ৰীসকলে মাৰবান্ধি ওলাই আহি বিদ্যালয় চৌহদৰ পৰিৱেশ উত্তাল কৰি তোলে। তাৰোপৰি কিছুসময় পাছতে বিদ্যালয়খনত অভিভাৱকসকল উপস্থিত হৈ শিক্ষাৰ্থীসকলৰ লগ লাগি অধ্যক্ষগৰাকীক কোঠাৰ ভিতৰতে আবদ্ধ কৰি ধুবুৰী আৰক্ষীক খবৰ দিয়ে।
ঘটনাৰ খবৰ লাভ কৰাৰ লগে লগে বিদ্যালয়ত উপস্থিত হয় আৰক্ষীৰ দল। আৰক্ষীয়ে কোঠাৰ ভিতৰত আবদ্ধ হৈ থকা অধ্যক্ষগৰাকীক নিৰাপদে উদ্ধাৰ কৰি থানালৈ নিয়ে।
উল্লেখ্য যে উক্ত ঘটনা সন্দৰ্ভত ভুক্তভোগী ছাত্ৰ আবু চায়েদে ধুবুৰী সদৰ থানাত এখন এজাহাৰ দাখিল কৰে। আৰু উক্ত এজাহাৰৰ ভিত্তিতে অধ্যক্ষগৰাকীক আটক কৰে আৰক্ষীয়ে।
ইফালে ঘটনা সন্দৰ্ভত অধ্যক্ষগৰাকীক গ্ৰেপ্তাৰ কৰি বিহিত ব্যৱস্থা গ্ৰহণৰ দাবী জনাইছে অভিভাৱক আৰু শিক্ষাৰ্থীসকলে।
