নাগালেণ্ডৰ লোকসভা আসনখনৰ বাবে অনুষ্ঠিত কৰিব লগীয়া উপ-নিৰ্বাচনৰ বাবে আজি ৬জনীয়া সদস্যৰ এখন ৰাজ্যিক পৰ্য্যায়ৰ কমিটি গঠন কৰা হয়। ষ্টেইট লেৱেল মিডিয়া চাৰ্টিফিকেইশ্যন এণ্ড মনিটৰিং কমিটি নামৰ এই কমিটিখনৰ অধ্যক্ষ হ’ল নাগালেণ্ডৰ মুখ্য নিৰ্বাচনী বিষয়া অভিজিৎ সিনহা। ভাৰতৰ নিৰ্বাচন আয়োগে নিযুক্তি দিয়া পৰ্য্যৱেক্ষকজনকো এই কমিটিখনৰ সদস্য কৰা হৈছে।
উল্লেখযোগ্য যে উপ-নিৰ্বাচন অহা ২৮ মে’ত অনুষ্ঠিত হ’ব। ভোট গণনা হ’ব ৩১ মে’ত।
আনহাতে নিৰ্বাচনৰ বাবে মনোনয়ন দাখিলৰ অন্তিম তাৰিখ ১০ মে’। ১১ মে’ হ’ব মনোনয়ন পৰীক্ষাৰ দিন। মনোনয়ন প্ৰত্যাহাৰৰ তাৰিখ নিৰ্ধাৰণ কৰা হৈছে ১৪ মে’।
উল্লেখযোগ্য যে কমিটিখনে জিলা আৰু অতিৰিক্ত মুখ্য নিৰ্বাচনী বিষয়াৰ কমিটিৰ পৰা অহা বিজ্ঞাপন সম্পৰ্কীয় ওজৰ-আপত্তিবোৰ আয়োগৰ ২০০৪ চনৰ 509/75/2004/JS-i নম্বৰৰ নিৰ্দেশটোৰ আধাৰত নিষ্পত্তি কৰিব। লগতে ই জিলা মিডিয়া চাৰ্টিফিকেইশ্যন এণ্ড মনিটৰিং কমিটিৰ সিদ্ধান্তৰ প্ৰত্যাহ্বান জনোৱা পেইড নিউজ সম্পৰ্কীয় সকলো গোচৰৰো নিষ্পত্তি কৰিব অথবা ই নিজাববীয়াকৈ লোৱা গোচৰবোৰ নিষ্পত্তি কৰিব।
কমিটিখনৰ অন্যান্য সদস্যসকল হ’ল তথ্য আৰু জনসংযোগ বিভাগৰ সঞ্চালক লিমাৱতী আও, ক’হিমাস্থিত এ আই আৰ নিউজৰ উপ-সঞ্চালক চাহু পাতলে, জ্যেষ্ঠ সাংবাদিক জেভিয়াৰ ৰুষ্টা। আনহাতে নাগালেণ্ড যুটীয়া মুখ্য নিৰ্বাচনী বিষয়া খেগুখা চেমা হ’ল সদস্য সচিব।
উল্লেখযোগ্য যে নাগালেণ্ডৰ একমাত্ৰ লোকসভা সমষ্টিটো খালী হৈছিল সাংসদ নেইফিঅ’ ৰিঅ’ মুখ্য মন্ত্ৰী হোৱাৰ ফলত। সদ্যসমাপ্ত বিধানসভাৰ নিৰ্বাচনৰ জয়ৰ সুবাদত মুখ্য মন্ত্ৰী হিচাপে নিৰ্বাচিত হৈছিল সাংসদজন।
