নাগা সমস্যা সমাধানৰ দাবীত নাগা সকলে জনোৱা বিধানসভা নিৰ্বাচন বৰ্জনৰ সিদ্ধান্তলৈ এনএছচিএন (আইএম)এ পূৰ্ণ সমৰ্থন আগবঢ়াইছে। এনএছচিএন (আইএম) চৰকাৰৰ আঝা (নিৰ্দেশ) অনুসৰি নাগা লোকসকলৰ সিদ্ধান্তক অৱমাননা কৰা যিকোনো কৰ্মীয়ে বিষম পৰিস্থিতিৰ মুখামুখি হ’ব লাগিব বুলি সংগঠনটোৱে সকীয়াই দিছে।
দেওবাৰে এক বিবৃতিত সংগঠনটোৱে কয় যে নাগা লোকসকলৰ সিদ্ধান্তৰ পক্ষত তেওঁলোকে শেষ মূহুৰ্তলৈকে থিয় দিব।
২৭ ফেব্ৰুৱাৰিত হ’ব লগীয়া নাগালেণ্ড বিধানসভা নিৰ্বাচনত ৰাজনৈতিক দল বিলাকে অংশগ্ৰহণ কৰাৰ সিদ্ধান্তৰ পিছতে বিদ্ৰোহী সংগঠনটোৱে উক্ত বিবৃতি জাৰি কৰিছে।
এনএছচিএন (আইএম)এ কয় যে তেওঁলোকে নাগা ট্ৰাইবেল হোহোবিলাকৰ ক’ৰ কিমিটী, চাৰ্চ, জনজাতীয় গোট তথা শীৰ্ষ নাগা সংগঠন সমূহে নাগা লোকসকলৰ পক্ষত থিয় দিয়াৰ আন্তৰিক তথা অটল স্থিতিক সম্পূৰ্ণ সমৰ্থন আগবঢ়াইছে।
সংগঠনটোৱে কয়,’ নাগা লোকসকলৰ ওপৰত নিৰ্বাচন জাপি দিয়াটো গ্ৰহণযোগ্য নহয় বুলি আমাৰ স্থিতিক পুনৰ স্পষ্ট কৰিছো’।
‘ভগৱান আৰু নাগা জনসাধাৰণে আমাৰ ওপৰত অৰ্পণ কৰা দায়িত্ব তথা বিশ্বাসক আমি প্ৰতাৰণা নকৰো’-বিবৃতিটোত লগতে কোৱা হয়।
বিবৃতিটোত এইটোও স্পষ্ট কৰা হয় যে এনএছচিএন-এ নাগা সকলৰ ঐতিহাসিক আৰু ৰাজনৈতিক অধিকাৰক সমৰ্থন কৰাৰ লগতে নাগা সকলৰ মৌলিক ইতিহাস আৰু পৰিস্থিতি তথা ২০১৫ৰ ৩ আগষ্টত ভাৰত চৰকাৰ আৰু এনএছচিএনৰ মাজত হোৱা ফ্ৰেমৱৰ্ক এগ্ৰিমেণ্টৰ ভিত্তিত এক সন্মানজনক ৰাজনৈতিক সমাধানৰ বাবে নিষ্ঠাৰে প্ৰয়াস চলাই যাব।
