বিদ্যালয়ৰ ছাত্ৰক অধ্যয়নৰ পৰা এৰুৱাই বিদ্যালয় গৃহ নিৰ্মাণৰ কামত শ্ৰম কৰিবলৈ বাধ্য কৰোৱাৰ অভিযোগ উঠিছে ত্ৰিপুৰাৰ ধৰ্মনগৰস্থিত জৱাহৰ নৱোদয় বিদ্যালয়ৰ শিক্ষকসমাজৰ বিৰুদ্ধে।
জানিব পৰামতে বিদ্যালয়খনৰ ৫ম, ৬ষ্ঠ, ৭ম আৰু ৮ম শ্ৰেণীৰ ছাত্ৰসকলক যোৱা ৪ জানুৱাৰিৰৰ পৰাই পাঠ গ্ৰহণৰ পৰিৱৰ্তে শ্ৰেণীৰ সময়তে আৰু য়ুনিফ’ৰ্মৰ সৈতেই বিদ্যালয়ৰ নিৰ্মাণ কাৰ্য্যত শ্ৰমিক হিচাপে কাম কৰিবলৈ বাধ্য কৰোৱা হৈছে। সূত্ৰটোৱে জনোৱামতে অধ্যক্ষ ৰাজেন্দ্ৰ প্ৰসাদ মিনা আৰু শিক্ষক জয় সিং মিনা (দুয়োজন ৰাজস্থানৰ)ই তেওঁলোকক ঘৰত এই কথা ক’লে ব্লেকলিষ্টেড কৰাৰ ভাবুকি দিছে।
এই ভাবুকিক আওকাণ কৰি কেইজনমান ছাত্ৰই তেওঁলোকৰ অভিভাৱকক জনায়। লগতে কৌশলেৰে তেওঁলোকৰ ওপৰত বিদ্যালয়ৰ সময়ছোৱাত চলোৱা উৎপীড়নৰ ভিডিঅ’ ৰেকৰ্ডিং কৰে।
অভিভাৱকসকলে এই সম্পৰ্কত উত্তৰ সংমণ্ডলৰ ডি এম শৰদেন্দু চৌধুৰীক অভিযোগ দিয়ে যদিও এই পৰ্য্যন্ত ডি এমজনে একো ব্যৱস্থা লোৱা নাই।
উল্লেখযোগ্য যে বিদ্যালয়লৈ পঠিওৱা ছাত্ৰ-ছত্ৰীক কামত লগোৱা বাদেই যিকোনো ধৰণৰ উৎপীড়নৰ খবৰ পোৱাৰ লগে লগে কাৰ্য্যব্যৱস্থা লোৱা উচিত আছিল যদিও অভিভাৱকৰ পৰা তথ্য-প্ৰমাণসহ অভিযোগ পোৱাৰ পিছতো কৰ্তৃপক্ষই কোনো তৎপৰতা নেদেখুওৱাত সন্দেহৰ গোন্ধ পাইছে অভিভাৱকে।
