অল ইণ্ডিয়া টাইগাৰ এষ্টিমেশ্যন চমুকৈ এ আই টি ই ২০১৮ৰ অংশ হিচাপে নাগালেণ্ডত পোন প্ৰথমবাৰৰ বাবে আৰম্ভ হ’ব বাঘৰ পিয়ল।
বন পৰিবেশ আৰু জলবায়ু পৰিবৰ্তন বিভাগৰ অন্তৰ্গত বন্যপ্ৰানী গোট এটাৰ পৰিচালনাত এই পিয়ল অনুষ্ঠিত হ’ব। এক প্ৰেছ বিবৃতিযোগে এই তথ্য প্ৰকাশ কৰিছে কিফিৰেৰ ৱাৰ্ডেন, আইএফএছ সুমন ডব্লিঅ এম শিৱাচৰে।
উল্লেখ্য যে বাঘৰ পিয়ল কাৰ্য সুচাৰুৰূপে সম্পন্ন হোৱাৰ বাবে যোৱা ৯ ফেব্ৰুৱাৰিত এ আই টি ইৰ সদস্যসকলৰ বাবে ডিমাপুৰত এক প্ৰশিক্ষণ শিবিৰ অনুষ্ঠিত কৰা হয়। উক্ত প্ৰশিক্ষণৰ সময়ছোৱাত বাঘৰ পিয়ল সন্দৰ্ভত বিভিন্ন তথ্য বিশ্লেষণৰ লগতে এক আখৰাও (mock drill )অনুষ্ঠিত কৰা হয়। প্ৰশিক্ষণ শিবিৰটোত মুঠ ২৫ জন সদস্যক বাঘৰ পিয়ল কেনে ধৰণে কৰা হয় তথা এই ক্ষেত্ৰত গ্ৰহণ কৰিব লগীয়া বিশেষ ব্যৱস্থা সমূহ কি কি সেয়া অৱগত কৰা হয়।
প্ৰসংগক্ৰমে উল্লেখযোগ্য যে কিফিৰেৰ ৱাৰ্ডেন, আইএফএছ সুমন ডব্লিঅ এম শিৱাচৰে ইয়াৰ পূৰ্বে ২০০৬, ২০১০, ২০১৪ অৰ্থাৎ প্ৰতি চাৰি বছৰৰ মূৰে মূৰে সমগ্ৰ দেশত বাঘৰ পিয়ল অনুষ্ঠত কৰি আহিছে।
ৰাজ্যখনত বাঘৰ পিয়ল সুকলমে সম্পন্ন কৰাৰ ক্ষেত্ৰত সংশ্লিষ্ট সকলোৰে সহায় সহযোগিতা কামনা কৰিছে বন বিভাগে।
