বিশিষ্ট ইংৰাজী লেখক অৰূপ কুমাৰ দত্তকে ধৰি অসমৰ তিনিগৰাকী প্ৰসিদ্ধ ব্যক্তিলৈ এইবছৰৰ পদ্মশ্ৰী সন্মান আগবঢ়োৱা হৈছে।
দত্তৰ উপৰি আন দুগৰাকী বিশিষ্ট ব্যক্তি হৈছে –প্ৰফুল্ল গোৱিন্দ বৰুৱা আৰু জয়শ্ৰী গোস্বামী মহন্তলৈ তেওঁলোকে সাহিত্য, শিক্ষা আৰু সাংবাদিকতালৈ আগবঢ়োৱা অৱদানৰ স্বীকৃতি স্বৰূপে পদ্মশ্ৰী বঁটাৰ বাবে নিৰ্বাচিত কৰা হৈছে।
অৰূপ কুমাৰ দত্ত গুৱাহাটীৰ এগৰাকী প্ৰসিদ্ধ লেখক আৰু তেওঁ ৩০ খনতৈকয়ো অধিক গ্ৰন্থ ৰচনা কৰিছে।
২০১৪ চনত নতুন দিল্লীৰ এচোচিয়েশ্যন অফ ৰাইটাৰছ এণ্ড ইলাষ্ট্ৰেটৰ ফৰ্ চাইল্ডৰেনে জীৱনজোৰা সাধনা বঁটাৰে সন্মানিত কৰিছিল।
১৯৭৯ চনত শংকৰ বঁটা লাভ কৰাৰ উপৰি তেওঁ বহুকেইটা বঁটা লাভ কৰিবলৈ সক্ষম হৈছে। তেওঁৰ গ্ৰন্থসমূহ বিভিন্ন বৈচিত্ৰ্যপূৰ্ণ বিষয়ৰ ওপৰত ৰচনা কৰা হৈছে। ‘দ্য ব্ৰহ্মপুত্ৰ’, ‘চা গৰম : দ্য টি ষ্ট’ৰী’, ইউনিকৰ্ণিছ : দ্য গ্ৰেট ইণ্ডিয়ান ৰাইন’চৰাছৰ দৰে বিভিন্ন বিষয়ৰ গ্ৰন্থৰ উপৰি সংগীতজ্ঞ, গায়ক তথা চলচ্চিত্ৰ নিৰ্মাতা ভূপেন হাজৰিকাৰ এখন জীৱনীমূলক ‘দ্য ৰ’ভিং মিনিষ্ট্ৰেল’ তেওঁ ৰচনা কৰা গ্ৰন্থ। ‘অংগৰিকা’ছ ছোৱনাছং’ হৈছে দত্তৰ এখন উপন্যাস।
দত্ত হৈছে ভাৰতৰ আটাইতকৈ পৰিচিত লেখকসকলৰ ভিতৰত এগৰাকী অন্যতম লেখক। পদ্মশ্ৰী লাভ কৰা বাতৰিত আনন্দ প্ৰকাশ কৰি দত্তই কয় যে তেওঁ এই বঁটাটো সাদৰেৰে গ্ৰহণ কৰিছে।
‘’ এগৰাকী লেখক হিচাপে মই আটাইতকৈ মূল্যৱান বঁটাটো পাইছো মোৰ পাঠকসকলৰ পৰা পোৱা সঁহাৰিত। কিন্তু যিকোনো স্বীকৃতিৰ এটা নিজা আনন্দ আছে। এই বঁটাটো মই সাদৰেৰে গ্ৰহণ কৰিছো,’’- নৰ্থ ইষ্ট নাওৰ আগত দত্তই এইদৰে কয়।
বৰ্তমান অসমৰ আগশাৰীৰ ইংৰাজী দৈনিক কাকত ‘দ্য আছাম ট্ৰিবিউন’ৰ সম্পাদক প্ৰফুল্ল গোবিন্দ বৰুৱা হৈছে ‘আধুনিক অসমৰ নিৰ্মাতা’ প্ৰয়াত ৰাধা গোৱিন্দ বৰুৱাৰ পুত্ৰ।
আনগৰাকী পদ্মশ্ৰী বঁটা লাভ কৰা জয়শ্ৰী গোস্বামী মহন্তই উপন্যাস আৰু আন গ্ৰন্থকে ধৰি প্ৰায় এক ডজনতকৈয়ো অধিক গ্ৰন্থ ৰচনা কৰিছে। তেওঁৰ কেইখনমান উল্লেখযোগ্য গ্ৰন্থ হৈছে ‘অসম আন্দোলন : জাতীয় চিন্তাৰ এক প্ৰতিফলন’, ‘চানক্য’, ‘ভূ কেন্দ্ৰলৈ অভিযান’, ‘মহাকবি’ ইত্যাদি।
জয়শ্ৰী গোস্বামী মহন্ত ৰাজ্যসভাৰ এগৰাকী প্ৰাক্তন সাংসদ আৰু অসমৰ প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ পত্নী।
