প্ৰিমিয়াৰ বেডমিণ্টন লীগত আজি হায়দৰাবাদ হাণ্টাৰ্ছৰ বিপক্ষে প্ৰতিদ্বন্দ্বিতাত নামিব ঘৰুৱা দল নৰ্থ-ইষ্টাৰ্ন ৱাৰিয়ৰ্ছ

গুৱাহাটীৰ নবীন চন্দ্ৰ বৰদলৈ ইনড’ৰ ষ্টেডিয়ামত শণিবাৰে শুভাৰম্ভণি হোৱা প্ৰিমিয়াৰ বেডমিণ্টন লীগত আজি দ্বিতীয় দিনা এখন গুৰুত্বপূৰ্ণ খেলত প্ৰতিদ্বন্দ্বিতাত নামিব ঘৰুৱা দল নৰ্থ-ইষ্টাৰ্ন ৱাৰিয়ৰ্ছ। পোন প্ৰথম বাৰৰ বাবে প্ৰতিযোগিতাত অভিষেক ঘটা নৰ্থ-ইষ্টাৰ্ন ৱাৰিয়ৰ্ছৰ প্ৰতিপক্ষ হ’ব যোৱাবাৰৰ ছেমিফাইনেলিষ্ট হায়দৰাবাদ হাণ্টাৰ্ছ। উত্তৰ-পূবৰ প্ৰতিনিধি নৰ্থ-ইষ্টাৰ্ন ৱাৰিয়ৰ্ছৰ অধিনায়ক অজয় জয়ৰামৰ লগতে প্ৰতুল যোশী আৰু চাইনিজ টাইপেৰ টজু ৱেই ৱাঙে পুৰুষৰ ছিংগলছত আৰু কানাডাৰ মিচিলী লীৰ লগতে ভাৰতৰ ৰুথৱিকা শিৱানীয়ে মহিলাৰ ছিংগলছত প্ৰতিদ্বন্দ্বিতা কৰিব। পুৰুষৰ ডাবলছত আছে কোৰিয়াৰ ছিন বেক ছেও আৰু কিম গি জং আৰু মহিলাৰ ডাবলছত যুজঁ দিব ভাৰতৰ প্ৰজক্তা ছাৱন্ত আৰু ছেনিওগিতা ঘোড়পড়েৰ যুটীয়ে। নৰ্থ-ইষ্টাৰ্ন ৱাৰিয়ৰ্ছৰ প্ৰশিক্ষকৰ দায়িত্বত আছে প্ৰাক্তন খেলুৱৈ নিখিল কাণিটকাৰ।

আনহাতে হায়দৰাবাদ হাণ্টাৰ্ছৰ মূল আকৰ্ষণৰ কেন্দ্ৰ বিন্দু হ’ল অলিম্পিকৰ স্বৰ্ণ পদক বিজয়ী তথা প্ৰাক্তন বিশ্ব ৰেংকিঙৰ ১নং খেলুৱৈ স্পেইনৰ কেৰ’লীনা মাৰিন। মাৰিনৰ লগত ছিংগলছত থাকিব ৰাছিকা ৰাজা। পুৰুষৰ ছিংগলছত প্ৰতিদ্বন্দ্বিতাত নামিব ভাৰতৰ এছ প্ৰণীত আৰু ৰাহুল যাদৱৰ লগতে কোৰিয়াৰ লী হুৱান ইলে। টাইপেৰ লু চিং ইয়াও আৰু কোৰিয়াৰ য়েন ছেয়ঙে পুৰুষৰ ডাবলছত আৰু মহিলাৰ ডাবলছত ইণ্ডোনেছিয়াৰ পিয়া জাবাডিয়াহ আৰু ভাৰতৰ অনুষ্কা পাৰিশৰ যুটীয়ে প্ৰতিদ্বন্দ্বিতা আগবঢ়াব।