ৰাষ্ট্ৰীয়তাবাদী কংগ্ৰেছ দলৰ নেতা তথা দলটোৰ ৰাষ্ট্ৰীয় সাধাৰণ সম্পাদক প্ৰফুল পেটেলে কালি মেঘালয়ত দলটোৰ ৰাজ্যিক কাৰ্য্যালয় মুকলি কৰাৰ পিছতে কংগ্ৰেছ আৰু বিজেপি দুয়োটা দলকে কঠোৰ সমালোচনা কৰে। বিশেষকৈ বিজেপিৰ প্ৰতি নেতাজনক অধিক কঠোৰ হোৱা দেখা গ’ল। বিজেপি নেতৃত্বাধীন এন ডি এ চৰকাৰখনে ৰাজ্যখনৰ পৰা গৈ ৰাষ্ট্ৰীয় ৰাজনীতিত প্ৰভাৱশালী নেতা হিচাপে নিজকে প্ৰতিষ্ঠা কৰিবলৈ সক্ষম হোৱা প্ৰয়াত পূৰ্ণ এ চাংমাৰ প্ৰতি সামান্যও সন্মান প্ৰদৰ্শন নকৰা বুলি অভিযোগ কৰে।
তাৎপৰ্য্যপূৰ্ণভাৱে পেটেলে মেঘালয়ত বিভাজনৰ ৰাজনীতিয়েও গা কৰি উঠিছে বুলি অভিযোগ কৰে। ‘মেঘালয় এখন শান্তিপ্ৰিয় আৰু ভাতৃত্ববোধসম্পন্ন ৰাজ্য। ইয়াত এতিয়া বিভেদৰ ৰাজনীতি দেখা গৈছে। খাদ্যাভ্যাসৰ পৰা ধৰ্ম বিশ্বাস তথা সাংস্কৃতিক ক্ষেত্ৰলৈকে বিভেদমূলক উপাদান দেখা গৈছে। কিন্তু মেঘালয়ৰ ৰাইজে এইবোৰক প্ৰতিহত কৰিব।’ ৰাজ্যসভাৰ সদস্যজনে কয়।
আনহাতে আগন্তুক নিৰ্বাচনত দলৰ স্থিতি সম্পৰ্কত মন্তব্য দি কয় যে দলটোৱে গাৰো পাহাৰৰ ২৪ টা সমষ্টিৰ ২২টাত আৰু খাচি-জয়ন্তীয়া পাহাৰৰ ৩৬ সমষ্টিৰ ২০টাত প্ৰতিদ্বন্দ্বিতা কৰিব। দলটোৱে অকলেই নিৰ্বাচন খেলিব বুলি স্পষ্ট কৰি দি কয় যে এন চি পি দলে কোনো ৰাষ্ট্ৰীয় দলৰ সৈতে মিত্ৰতা নকৰে। অৱশ্যে আঞ্চলিক দলৰ সৈতে কিছু বুজাবুজি থাকিব বুলি কয়। লগতে তেওঁ ভৱিষ্যতে ধৰ্ম নিৰপেক্ষ দৃষ্টিভংগিৰ ক্ষেত্ৰত সমভাবাপন্ন দলৰ সৈতে কাম কৰাৰ ইংগিত দিয়ে।
উল্লেখযোগ্য যে প্ৰাক্তন লোকসভাৰ অধ্যক্ষ তথা ৰাজ্যখনৰ এজন প্ৰভাৱশালী নেতা পূৰ্ণ এ চাংমাও এন চি পি নামৰ ৰাষ্ট্ৰীয় দলটোৰ এজন প্ৰতিষ্ঠাপক নেতা আছিল যদিও দলটোৱে ৰাজ্যখনত বৰ বিশেষ প্ৰভাৱ বিস্তাৰ কৰিব নোৱাৰিলে। যোৱা বিধান সভা নিৰ্বাচনত দলটোৱে মাত্ৰ দুখন আসনহে পাইছিল। আনহাতে দলটোৱে শাসনাধিষ্ঠিত কংগ্ৰেছ দলৰ সৈতে ৰাজ্যখনত চৰকাৰৰ অংশীদাৰ হৈ আছে যদিও প্ৰফুল পেটেলে অভিযোগ কৰে যে অংশীদাৰ দল হিচাপে তেওঁলোকক প্ৰাপ্য সন্মান দিয়া হোৱা নাই। আনহাতে কংগ্ৰেছ চৰকাৰখনে চূড়ান্ত অনিয়ম আৰু দুৰ্নীতিত লিপ্ত হোৱা বুলি অভিযোগ কৰিছে নেতাজনে।
