অসমৰ ৰাইজৰ ওপৰত অতিৰিক্ত বোজা জাপি দিয়াৰ উদ্দেশ্যেৰে ৰাজ্য চৰকাৰে বিদ্যুৎ আইন ২০১৪’ৰ সংশোধনী কৰিব বিচৰাৰ তীব্ৰ বিৰোধিতা কৰিছে অসম বিদ্যুৎ বিতৰণ কোম্পানী লিমিটেডৰ বহিৰ্উৎস অস্থায়ী কাৰিকৰী কৰ্মী সন্থাই।
বঙাইগাঁৱ জিলা বহি:উৎস অস্থায়ী বিদ্যুৎ কমৰ্চাৰীসকলৰ সংগঠনটোৰ সাধাৰণ সম্পাদক ধনজিৎ কুমাৰ ৰয়ে এক বিবৃতিত আইনখনৰ সংশোধনীৰ তীব্ৰ বিৰোধিতা কৰি কয় যে সংশোধনীয়ে বিদ্যুৎ বিভাগত নতুন নিয়োগৰ পথ ৰুদ্ধ কৰি তুলিব।
তেওঁ উল্লেখ কৰে যে ইয়াৰ ফলত দীৰ্ঘদিন ধৰি বিদ্যুৎ খণ্ডত অস্থায়ী কৰ্মচাৰী হিচাপে কাম কৰি থকা হেজাৰ হেজাৰ যুৱক-যুৱতী স্থায়ী সংস্থাপনৰ পৰা বঞ্চিত হ’ব।
ক্ষমতালৈ অহাৰ পূৰ্বে স্থায়ী নিযুক্তিৰে ৰাজ্যৰ নিবনুৱা সমস্যা সমাধানৰ সংকল্পৰ কথা ঘোষণা কৰা বিজেপি চৰকাৰখনে এনে সংশোধনীৰ দ্বাৰা নিজৰেই প্ৰতিশ্ৰুতি ভংগ কৰিছে বুলি বিবৃতিটোত ক্ষোভ প্ৰকাশ কৰা হৈছে।
নতুনকৈ আনিব বিচৰা সংশোধনীয়ে সৰ্বসাধাৰণ ৰাইজকো ক্ষতিগ্ৰস্ত কৰিব বুলি উল্লেখ কৰি বিবৃতিটোত কোৱা হৈছে যে বিদ্যুৎ আইন সংশোধনৰ পিছত গ্ৰাহকে বহু উচ্চ হাৰত বিদ্যুৎ ক্ৰয় কৰিব লাগিব।
বিদ্যুৎআইন সংশোধনৰ বিৰোধিতা কৰি বঙাইগাঁৱ জিলাৰ বহি:উৎস অস্থায়ী কাৰিকৰী কৰ্মী সন্থাৰ এখন সাধাৰণ সভা অভয়াপুৰীত অনুষ্ঠিত হয়। সভাত নজৰুল ইছলামক সভাপতি আৰু ধনজিৎ কুমাৰ ৰয়ক সাধাৰণ সম্পাদক হিচাপে লৈ সংগঠনটোৰ বঙাইগাঁৱ জিলাৰ সমিতিখন নতুনকৈ গঠন কৰা হয়।
সভাত বিদ্যুৎআইন সংশোধনৰ বিৰোধিতা আৰু অস্থায়ী কৰ্মচাৰীসকলৰ চাকৰি নিয়মীয়া কৰাৰ লগতে কৰ্মচাৰীসকলৰ বিভিন্ন অসুবিধাসমূহ আঁতৰ কৰাৰ দাবীত অহা ১৪ মাৰ্চত দিচপুৰত ধৰ্ণা কাৰ্যসূচী ৰূপায়নৰো সিদ্ধান্ত ঘোষণা কৰে।
