সোণৰিত আজি পুৱা এগৰাকী কণমানি ছাত্ৰই বিদ্যুৎ বিভাগৰ গাফিলতিৰ বাবে বিদ্যুৎ পৰিবাহী এডাল ছিগা তাঁৰত লাগি মৃত্যুক আঁকোৱালি ল’ব লগা হয়।
উল্লেখযোগ্য যে আজি পুৱা সোণাৰিৰ টিয়ক বঙালী গাঁৱৰ এটি দৰিদ্ৰ পৰিয়ালৰ কণমানি ছাত্ৰ মনিষ মুণ্ডা(৫)ই অংগনৱাড়ী কেন্দ্ৰলৈ যায়। আৰু কিছু সময়ৰ পিছত ছাত্ৰজনে কেন্দ্ৰটোৰ পৰা বাহিৰলৈ ওলাই আহোতেই দুৰ্ঘটনাটো সংঘটিত হয়।
পিছত স্থানীয় ৰাইজে ছাত্ৰজনক পথাৰত পৰি থকা দেখাত লগে লগে অঞ্চলটোত এক হুলস্থলীয়া পৰিৱেশৰ সৃষ্টি হয়। লগে লগে স্থানীয় ৰাইজে বিদ্যুৎ কৰ্তন কৰি ছাত্ৰজনক উদ্ধাৰ কৰে যদিও ছাত্ৰজনে ইতিমধ্যে মৃত্যুক আঁকোৱালি লয়।
ইফালে এই ঘটনা সংঘটিত হোৱাৰ লগে লগে অংগনৱাড়ী কেন্দ্ৰটোৰ শিক্ষয়িত্ৰী কবিতা দত্তক স্থানীয় একাংশ লোকে প্ৰহাৰ কৰাৰ লগতে অঞ্চলটোত এক উত্তপ্ত পৰিস্থিতিৰ সৃষ্টি কৰে। স্থানীয় লোকসকলে ছাত্ৰজনে অংগনৱাড়ী কেন্দ্ৰটোত অধ্যয়ন কৰি থকা অৱস্থাত কি দৰে বাহিৰলৈ ওলাই আহিবলৈ পালে বুলি প্ৰশ্ন উত্থাপন কৰে।
অৱশ্যে পিছত স্থানীয় আৰক্ষী উপস্থিত হৈ পৰিস্থিতি নিয়ন্ত্ৰণ কৰাৰ লগতে অংগনৱাড়ী কেন্দ্ৰৰ শিক্ষয়িত্ৰী গৰাকীকো উদ্ধাৰ কৰে।
আনহাতে স্থানীয় ৰাইজে জানিবলৈ দিয়া মতে অঞ্চলটোত উচ্চ ক্ষমতা সম্পন্ন বিদ্যুৎ পৰিবাহী তাঁৰডাল ছিগি পৰি থকাৰ বিষয়ে বিদ্যুৎ বিভাগক জনোৱা হৈছিল যদিও এই ক্ষেত্ৰত বিদ্যুৎ বিভাগে কোনো ধৰণৰ গুৰুত্ব প্ৰদান নকৰে। ফলত বিদ্যুৎ বিভাগৰ এনে গাফিলতিৰ পৰিণতিতে আজি কণমানি ছাত্ৰজনে মৃত্যুক আঁকোৱালি ল’ব লগা হ’ল বুলি স্থানীয় ৰাইজে অভিযোগ উত্থাপন কৰে।
ইফালে শক্তি মন্ত্ৰী তপন গগৈয়ে নিহত কণমানি ছাত্ৰজনৰ পৰিয়াললৈ ২.৫ লাখ টকাৰ ক্ষতিপূৰণ দিয়াৰ ঘোষণা কৰে। লগতে এই সমস্ত ঘটনাৰ বাবে গভীৰ দুখ প্ৰকাশ কৰি সমগ্ৰ ঘটনা সন্দৰ্ভত এক উচ্চ পৰ্যায়ৰ তদন্ত ঘোষণা কৰে।
