বেডমিণ্টন এছ’চিয়েশ্যন অৱ ইণ্ডিয়াৰ সভাপতি পদত বিনা প্ৰতিদ্বণ্ডিতাৰে নিৰ্বাচিত হৈছে অসম চৰকাৰৰ কেবিনেট মন্ত্ৰী ড০ হিমন্ত বিশ্ব শৰ্মা। মঙলবাৰে গোৱাত অনুষ্ঠিত বেডমিণ্টন সন্থাৰ বাৰ্ষিক সাধাৰণ সভাত ড০ শৰ্মাক চাৰিবছৰীয়া কাৰ্যকালৰ বাবে নিৰ্বাচিত কৰে।
মনকৰিবলগীয়া যে ৩১ খন স্বীকৃতিপ্ৰাপ্ত ৰাজ্যিক সন্থাৰ ৬১ গৰাকী সংগঠকে বাৰ্ষিক সাধাৰণ সভাত নিজৰ ভোটদান সাব্যস্ত কৰি কমিটিখন গঠন কৰে।
অসম বেডমিণ্টন সন্থাৰ সাধাৰণ সম্পাদক ওমৰ ৰছিদে সম্পাদক(ইভেণ্ট) পদত আৰু মহাৰাষ্ট্ৰ বেডমিণ্টন সন্থাৰ প্ৰতিনিধি অৰুণ লাখনিয়ে জ্যেষ্ঠ উপ-সভাপতি পদত বিনা প্ৰতিদ্বণ্ডিতাৰে নিৰ্বাচিত হয়।
উল্লেখ্য যে সন্থাৰ প্ৰাক্তন সভাপতি ড০ অখিলেশ দাসগুপ্তাৰ বিয়োগ ঘটাত অসমৰ স্বাস্থ্য আৰু বিত্ত মন্ত্ৰী ড০ শৰ্মাই প্ৰায় এবছৰ ধৰি সন্থাৰ ভাৰপ্ৰাপ্ত সভাপতি হিচাপে দায়িত্ব পালন কৰি আহিছে।
ইফালে বেডমিণ্টন সন্থাৰ সভাপতি হিচাপে নিৰ্বাচিত হৈ ড০ শৰ্মাই নিজৰ মত প্ৰকাশ কৰি কয় যে মোক সভাপতি হিচাপে নিৰ্বাচিত কৰাৰ বাবে সকলো বিষয়ববীয়াকে ধন্যবাদ জ্ঞাপন কৰিলো। ইয়াৰ উপৰি তেওঁৰ কাৰ্যকালত ভাৰতীয় বেডমিণ্টনক বিশ্ব পৰ্যায়ত এক আগশাৰীৰ পৰ্যায়লৈ লৈ যোৱাৰ বাবে সকলো প্ৰকাৰৰে যত্ন কৰিব বুলিও উল্লেখ কৰে।
কালি অনুষ্ঠিত হোৱা বাৰ্ষিক অধিৱেশনতে পৰৱৰ্তী কাৰ্যকালৰ বাবে সভাপতি, জ্যেষ্ঠ সভাপতি, ১২গৰাকী উপসভাপতি, তিনিগৰাকী সম্পাদক, আঠগৰাকী যুটীয়া সম্পাদক আৰু ১৬ গৰাকী কাৰ্যকৰী সমিটিৰ সদস্যসহ ৪২ জনীয়া কমিটি গঠন কৰে।
বাৰ্ষিক সাধাৰণ সভাত নিৰ্বাচনী বিষয়া হিচাপে উপস্থিত থাকে জন্মু-কাশ্মীৰ আৰু ছিকিম উচ্চ ন্যায়ালয়ৰ অৱসৰপ্ৰাপ্ত মুখ্য ন্যায়াধীশ ড০ আফতাব হুছেইন শইকীয়া।
উল্লেখযোগ্য যে দিল্লীৰ কমলেশ বাৰ্মা নামৰ এজন লোকে যোৱা ৩০ জানুৱাৰিত দেশৰ শীৰ্ষতম আদালতত অসমৰ মন্ত্ৰী হিমন্ত বিশ্ব শৰ্মাক বেডমিণ্টন এছ’চিয়েশ্যন অৱ ইণ্ডিয়াৰ দায়িত্বৰ পৰা আঁতৰাবৰ বাবে এখন ৰাজহুৱা স্বাৰ্থজনিত আবেদন দাখিল কৰিছিল।
উক্ত আবেদনখনত কোৱা হৈছে যে ভাৰতৰ ক্ৰিকে’ট নিয়ন্ত্ৰণ ব’ৰ্ড সন্দৰ্ভত ন্যায়াধীশ আৰ এম লোধাই পূৰ্বে দিয়া এটা ৰায়ত যিহেতু এজন মন্ত্ৰী বা এজন চৰকাৰী বিষয়া কোনো এটা ক্ৰীড়া সংস্থাৰ বিষয়ববীয়া হ’ব নোৱাৰে তেন্তে মন্ত্ৰী হিমন্ত বিশ্ব শৰ্মা এই দায়িত্বত থকাটো সম্পূৰ্ণ বে-আইনী।
ইফালে আবেদনখন যোৱা ৫ মাৰ্চত উচ্চতম ন্যায়ালয়ে গ্ৰহণ কৰে যদিও এতিয়া এই ক্ষেত্ৰত নৱনিৰ্বাচিত সভাপতি ড০ শৰ্মাৰ বিৰুদ্ধে কি ব্যৱস্থা গ্ৰহণ কৰে সেয়া সময়ত লক্ষ্যণীয় হ’ব।
