ব্ৰহ্মপুত্ৰৰ পানী দূষিত হোৱা বিষয়টো গুৰুত্ব সহকাৰে ল’বলৈ কেন্দ্ৰীয় আৰু ৰাজ্য চৰকাৰক আছুৰ আহ্বান

ব্ৰহ্মপুত্ৰৰ পানী দূষিত হোৱা বিষয়টো গুৰুত্ব সহকাৰে ল’বলৈ কেন্দ্ৰীয় আৰু ৰাজ্য চৰকাৰক আহ্বান জনাইছে সদৌ অসম ছাত্ৰ সন্থাই। আজি ছাত্ৰ সংগঠনটোৱে nenow.in লৈ প্ৰেৰণ কৰা সভাপতি  দীপাংক কুমাৰ নাথ স্বাক্ষৰিত এটা প্ৰেছবিজ্ঞপ্তিতৰ জৰিয়তে এই কথা প্ৰকাশ কৰে। তেওঁলোকে কয় যে ব্ৰহ্মপুত্ৰ অসমৰ আয়ুসৰেখা আৰু ইয়াৰ পানী দূষিত হোৱাটো এটা ভয়ংকৰ প্ৰাকৃতিক দুৰ্য্যোগ বুলিব পাৰি। সংগঠনটোৱে এই দুৰ্যোগটো সন্দৰ্ভত প্ৰধান মন্ত্ৰী নৰেন্দ্ৰ মোদীৰ তৎপৰতা আৰু হস্তক্ষেপ দাবী কৰিছে। আছুৱে লগতে কয় যে গংগা নদীৰ এনে সংকট হোৱা হ’লে গোটেই নেতাসকল উবুৰিখাই পৰিলহেঁতেন। কিন্তু অসমৰ ক্ষেত্ৰত হোৱা বাবে কাণসাৰ কৰা নাই। ইয়াক কেন্দ্ৰৰ বৈষম্য বুলি তেওঁলোকে অভিহিত কৰে। আনহাতে বিষয়টোক উচিত গুৰুত্ব সহকাৰে কেন্দ্ৰৰ ওচৰলৈ নিব নোৱৰা বাবেও আছুৱে ৰাজ্য চৰকাৰক সমালোচনা কৰে। তাৰোপৰি অসম চৰকাৰে এতিয়াও অসমৰ মানুহক বিকল্প খোৱাপানীৰ যোগান ধৰিব পৰা নাই আৰু প্ৰদূষণ পৰিষদৰ ভূমিকাও নিষ্ক্ৰিয় বুলি সংগঠনটোৱে অভিযোগ কৰে। ব্ৰহ্মপুত্ৰক ৰক্ষা কৰিবলৈ কেন্দ্ৰীয় চৰকাৰ আৰু ৰাজ্য চৰকাৰে উপযুক্ত ব্যৱস্থা ল’বই লাগিব বুলি সংগঠনটোৱে দাবী কৰে। কেন্দ্ৰই অসমলৈ বিভাগীয় মন্ত্ৰী আৰু কেন্দ্ৰীয় মন্ত্ৰীৰ দল প্ৰেৰণ কৰাৰো দাবী তোলে সংগঠনটোৱে। এই ভয়ংকৰ দুৰ্য্যোগটো ক’ৰ পৰা হৈছে, কিয় হৈছে এইবোৰ কথা দেশবাসী তথা অসমৰ ৰাইজক জনাওক। কোনো কথা ৰাইজৰ পৰা লুকুওৱা উচিত নহয় বুলি বিবৃতোটোত কোৱা হৈছে। সংগঠনটোৱে বিদেশত থকা বিজ্ঞানী, অভিযন্তা, বিশেষজ্ঞ অসমীয়াসকলকো এই সমস্যাটোৰ বিষয়ে পৃথিৱীৰ এই বিষয়ৰ বিশেষজ্ঞসকলক অৱগত কৰাবলৈ অনুৰোধ জনায়।

উল্লেখযোগ্য যে চীনে সুৰংগ খান্দি চিয়াং নদীৰ পানী অন্যফালে বোৱাবলৈ চেষ্টা কৰাৰ বাবে ইয়াৰ পানীত চিমেণ্ট-মাটি মিহলি হৈ দূষিত হোৱা বুলি ভাৰতৰ কিছু কিছু সংবাদমাধ্যমৰ লগতে অসম তথা অৰুণাচলৰ জনসাধাৰণে সন্দেহ প্ৰকাশ কৰি আছে। চিয়াং নদী হ’ল ব্ৰহ্মপুত্ৰৰ উজনিৰ এটা সুঁতি। এই নদীৰ পানী দূষিত হোৱা বাবে ব্ৰহ্মপুত্ৰৰ পানীও দূষিত হৈছে।