ওদালগুৰিৰ পানেৰিত চলি থকা বড়ো সাহিত্য সভাৰ ওদালগুৰি জিলা সমিতিৰ ৪৯ সংখ্যক বাৰ্ষিক সন্মিলনৰ আজি সামৰণি পৰে। দুদিনীয়াকৈ অনুষ্ঠিত কাৰ্যসূচীটোত ভালেমান বৰ্ণাঢ্য কাৰ্যসূচী লোৱা হৈছিল।
মুকলি সভাখন উদ্বোধন কৰে মাজবাটৰ প্ৰাক্তন বিধায়ক ৰাকেশ্বৰ বৰোৱে। মুকলি সভাত সভাপতিত্ব কৰে ওদালগুৰি জিলা সভাপতি কামেশ্বৰ বৰোৱে।
বৰো সাহিত্য সভাৰ সভাপতি টৰেন বৰোৱে মুখ্য অতিথি হিচাপে মুকলি সভাখনত অংশ গ্ৰহণ কৰি কয়, ‘আজিৰ বিশ্বায়ন আৰু বিজ্ঞানৰ অগ্ৰগতিৰ যুগত বৰোসকলে তেওঁলোকৰ ভাষাক বিশ্বৰ দৰবাৰত প্ৰতিষ্ঠা কৰাৰ বাবে সংগ্ৰাম কৰিব লগীয়া হৈছে।’ তেওঁ লগতে কয় যে বৰো মাধ্যমৰ শিক্ষাৰ বাবে সুকীয়া সঞ্চালকালয় স্থাপন কৰাৰ ক্ষেত্ৰত চকৰাৰে সদায় হেমাহি প্ৰদৰ্শন কৰি আহিছে।
অনুষ্ঠানটোত জিলাখনৰ যশস্বী খেলুৱৈ আৰু সফল ছাত্ৰ-ছাত্ৰীসকলক সম্বৰ্ধনা জনোৱা হয়। খেলুৱৈসকলৰ ভিতৰত বক্সাৰ যমুনা বৰো, আৰ্চাৰ প্ৰমীলা দৈমাৰীও আছিল।
আনহাতে কাৰ্য্যসূচীৰ মাজতে ড০ লীলাধৰ ব্ৰহ্মক তেওঁৰ গ্ৰন্থ বড়ো মোচানয় নামৰ গ্ৰন্থখনৰ বাবে মংগল চান্দী ব্ৰহ্ম সাহিত্য বঁটা-২০১৮ প্ৰদান কৰা হয়।
উল্লেখযোগ্য যে মুকলি সভাখনত মন্ত্ৰী ৰিহন দৈমাৰী, চেৰফাং ননৈৰ এম চি এল এ সুৰেশ তাঁতীও উপস্থিত আছিল।
