সত্ৰীয়া সংস্কৃতিৰ প্ৰাণকেন্দ্ৰ সত্ৰনগৰী বৰপেটাত আজিৰে পৰা আৰম্ভ হয় হোলী ঢোলৰ শীতকালীন প্ৰশিক্ষণ শিবিৰ।
একাডেমী অব খোলবাদ্যৰ উদ্যোগত আৰু ক্লাব ৰাইনোৰ সহযোগত হোলী ঢোল বাদ্যৰ বিশেষ প্ৰশিক্ষণ শিবিৰ শুভাৰম্ভ কৰে বিশিষ্ট শিল্পী প্ৰদীপ কুমাৰ মিশ্ৰই।
বৰপেটা চহৰৰ ক্লাব ৰাইনোত আজি বিয়লি চাৰি বজাত হোলী ঢোল বাদ্যৰ প্ৰশিক্ষণ কাৰ্যসূচী শুভাৰম্ভ কৰি উদ্বোধক মিশ্ৰই কয় যে হোলী ঢোলৰ বাজনাই হোলীগীত গোৱা শিল্পীসকলৰ দেহ সঞ্চালন কৰে। পূৰ্বৰ হোলীগীত আৰু বৰ্তমানৰ হোলীগীতৰ মাজত কিছু পাৰ্থক্য দেখা যায় যদিও হোলীগীতসমূহত এতিয়াও আধ্যাত্মিকতা অক্ষুণ্ণ থকা বুলি তেওঁ মন্তব্য কৰে।
মিশ্ৰই তেওঁৰ বক্তৃতাত হোলীগীতত আধ্যাত্মিকতা অক্ষুণ্ণ ৰখাৰ বাবে নৱ-প্ৰজন্মৰ শিল্পীসকলক আহ্বান জনায়।
আজিৰে পৰা আৰম্ভ হোৱা এমাহজোৰা হোলী ঢোলৰ শীতকালীন প্ৰশিক্ষণ শিবিৰত প্ৰায় ৮০ গৰাকী প্ৰশিক্ষাৰ্থীয়ে অংশগ্ৰহণ কৰিছে।
অনুষ্ঠানত বৰপেটা সাংস্কৃতিক কেন্দ্ৰৰ ভাৰপ্ৰাপ্ত বিষয়া ভূদেৱ দাস, শিল্পী কবিন দাস, মাধৱ চৌধুৰী মহাবিদ্যালয়ৰ অধ্যাপক ডঃ ইন্দ্ৰজ্যোতি ৰায়চৌধুৰী, ডঃ নিৰ্মলৰঞ্জন মজুমদাৰৰ লগতে হোলীগীতৰ শিল্পী প্ৰমথৰঞ্জন (কণ্টি), বৰপেটা প্ৰেছ ক্লাবৰ সম্পাদক নৱজিৎ দাস, ক্লাব ৰাইনোৰ সম্পাদক নৃপেন দাসৰ লগতে কেবাগৰাকী বিশিষ্ট ব্যক্তিয়ে অংশগ্ৰহণ কৰে।
একাডেমী অব খোলবাদ্যৰ মুখ্য প্ৰশিক্ষক মনোজ কুমাৰ দাসে আঁত ধৰা এই অনুষ্ঠানতে প্ৰশিক্ষাৰ্থীসকলে হোলী ঢোল বাদ্য প্ৰদৰ্শন কৰে।
বয়স অনুযায়ী দুটা শাখাত বিভক্ত কৰা প্ৰশিক্ষণ কাৰ্যসূচীটোত ‘ক’ শাখাত ছয় বছৰৰ পৰা পোন্ধৰ বছৰ বয়সৰ আৰু ‘খ’ শাখাত পোন্ধৰৰ পৰা পঞ্চাশ বছৰ বয়সৰ প্ৰশিক্ষাৰ্থীসকলক প্ৰশিক্ষণ প্ৰদান কৰা হ’ব বুলি মুখ্য প্ৰশিক্ষক মনোজ কুমাৰ দাসে সদৰী কৰে।
