বৰপেটাৰোডৰ নিচুকাত কালি সংঘটিত হোৱা এক নৃশংস হত্যাকাণ্ডত ভায়েকৰ হাতত প্ৰাণ হেৰুৱাবলগীয়া হ’ল ককায়েকে। জানিব পৰা মতে প্ৰয়াত শিবু মিঞাৰ ছয় পুত্ৰই মাটি-বাৰী, সা-সম্পতিক কেন্দ্ৰ দীৰ্ঘদিন ধৰি কণ্ডলত লিপ্ত হৈ আহিছিল। যাৰ পৰিণতিত কালি এনেধৰণৰৰ লোমহৰ্ষক হত্যাকাণ্ডৰ ঘটনা সংঘটিত হ’ল। মৃত লোকজনৰ নাম কদ্দুচ আলী বুলি জানিব পৰা গৈছে। প্ৰাপ্ত তথ্য অনুসৰি কালি দিনৰ ১:৩০ মান বজাত মৃত কদ্দুচৰ ভাতৃ আজগড় আলীয়ে তেওঁলোকৰ বাহবাৰীৰ পৰা এটা বাহ কাটি আনিছিল। সেই কথাক কেন্দ্ৰ কৰি দুয়ো ককায়েক-ভায়েক প্ৰথম অৱস্থাত তৰ্ক-বিতৰ্কত লিপ্ত হয় যদিও খঙত অগ্নিশৰ্মা হৈ পৰা আজগড় আলিয়ে এডাল বাঁহেৰে পিছফালৰ পৰা মূৰত প্ৰহাৰ কৰাত কদ্দুচ থিতাতে বাগৰি পৰে। এই ঘটনা সংঘটিত হোৱাৰ সময়ত তেওঁলোকৰ মাতৃ আৰু অন্য এজন ভায়েক ঘটনাস্থলীত উপস্থিত আছিল যদিও তেওঁলোকে একো তৰ্কিবই নোৱাৰিলে। ভাতৃৰ আক্ৰমণত গুৰুত্বৰভাৱে আহত হোৱা ককায়েক কদ্দুচক ততাতৈয়াকৈ বৰপেটা চিকিৎসা মহাবিদ্যালয়লৈ লৈ যোৱা হয় যদিও চিকিৎসালয়ত তেওঁ শেষ নিশ্বাস ত্যাগ কৰে। ইফালে ঘটনা সংঘটিত কৰিয়ে হত্যাকাৰী আজগড়ে ঘৰৰ পৰা পললায়ন কৰে। আৰক্ষীয়ে বৰ্তমান সময়ত পলাতক আজগড়ৰ সন্ধান উলিওৱাৰ চেষ্টা কৰি আছে যদিও সফল হ’ব পৰা নাই।
