“বিজেপিয়ে ভাৰতত থকা হিন্দুকে নিৰাপত্তা দিব পৰা নাই, অথচ বিশ্বৰ হিন্দুৰ কথা চিন্তা কৰে।” এই মন্তব্য শিৱসেনা প্ৰধান উদ্ধৱ থাকৰেৰ। অসমৰ আঞ্চলিক দল তথা ৰাজ্যৰ বিজেপি নেতৃত্বাধীন চৰকাৰখনৰ অংশীদাৰ অগপৰ এটা প্ৰতিনিধি দলে যোৱা ১৬ জুনত নাগৰিকত্ব সংশোধনী বিধেয়কখনৰ বিৰোধিতাত সমৰ্থন বিচাৰি মুম্বাইত শিৱসেনাৰ মুৰব্বীজনক সাক্ষাৎ কৰাৰ পিছত কালি এখন সভাত এইদৰে মন্তব্য কৰিছে উদ্ধৱ থাকৰেই।
সভাখনত নিজৰ ভাষণত বিজেপি সম্পূৰ্ণ ৰূপে বিফল বুলি উল্লেখ কৰি থাকৰেই কয় যে অসমৰ স্বাৰ্থত আঘাত কৰিব পৰা এনেকুৱা কোনো বিধেয়ক যদি বিজেপিয়ে সংসদত উত্থাপন কৰে, তেন্তে শিৱসেনাৰ সকলো সাংসদে বিৰোধিতা কৰিব। “বাংলাদেশৰ হিন্দুক আনিব খুজিছাই যেনিবা, কিন্তু এই হিন্দুক চিনিব কেনেকৈ? বাংলাদেশীৰ বেশত যদি পাকিস্তানীও আহে তেতিয়া তুমি কি কৰিব?” এইদৰে কয় শিৱসেনাৰ প্ৰধানজনে।
উল্লেখযোগ্য যে ইয়াৰ পূৰ্বে নাগৰিকত্ব সংশোধনী বিধেয়কৰ বিৰোধিতাত নীতিশ কুমাৰেও অগপক সহায় কৰাৰ প্ৰতিশ্ৰুতি দিছিল।
আনহাতে উত্তৰ-পূবত এই বিধেয়কখনৰ বিৰোধিতাত এক প্ৰকাৰৰ গণ-বিৰোধ দেখা গৈছে। অসমত বিজেপি দলৰ বাদে আন সকলো ৰাজনৈতিক দলেই বিধেয়কখনৰ বিৰোধিতা কৰিছে। বিজেপি অংশীদাৰ হৈ থকা মেঘালয় চৰকাৰেও বিলখনৰ বিৰোধিতা কৰি কেবিনেটত সিদ্ধান্ত লৈছে।
