ৰাজ্যখনত আদাৰ উৎপাদন বৃদ্ধি কৰাৰ লক্ষ্যৰে মণিপুৰ চৰকাৰে প্ৰথমবাৰৰ বাবে আদা মহোৎসৱ আয়োজন কৰাৰ পৰিকল্পনা কৰিছে।
মণিপুৰৰ উদ্যান শস্য আৰু ভূমি সংৰক্ষণ বিভাগৰ মন্ত্ৰী থাওনাওজাম শ্যামকুমাৰ সিঙে বুধবাৰে বিধানসভাত এই কথা প্ৰকাশ কৰিছে।
সিঙে কয় যে প্ৰথমবাৰৰ বাবে আদা মহোৎসৱখন চলিত মাৰ্চ মাহতে পেৰজৱাল জিলাত অনুষ্ঠিত কৰা হ’ব।
‘’মণিপুৰ চৰকাৰে ৰাজ্যখনত আদা উৎপাদন আৰু ইয়াৰ সম্প্ৰসাৰণৰ বিষয়ে চিন্তা কৰি ৰাজ্য চৰকাৰে এই ব্যৱস্থা গ্ৰহণৰ দিশত কাম কৰি আছে,’’-তেওঁ কয়।
বিধানসভাত এক আলোচনাকালত বিৰোধী বিধায়কৰ সমালোচনাৰ প্ৰত্যুত্তৰ দি সিঙে এই কথা ব্যক্ত কৰে।
মণিপুৰে কচাইত নেমু টেঙা মহোৎসৱ, টামেংলঙত কমলা মহোৎসৱ আৰু পূব ইম্ফলৰ এণ্ড্ৰোত আনাৰস মহোৎসৱৰ দৰে উৎসৱ উদযাপন কৰি আহিছে।
‘’আমাৰ বিভাগে লগতে আফু গছৰ ঠাইত কুইন’ৱা গছ ৰোপনৰ পৰিকল্পানা কৰিছে। কুইন’ৱা এবিধ ফুলজাতীয় গছ আৰু ইয়াৰ গুটিবোৰ খাদ্য হিচাপে ব্যৱহাৰ হয়,’’-মন্ত্ৰীগৰাকীয়ে জানিবলৈ দিয়ে।
তেওঁ লগতে কয় যে চৰকাৰে চলিত বিত্তীয় বৰ্ষৰ পৰাই ভূমি পৰীক্ষণৰ সুবিধা আৰম্ভ কৰাৰ পৰিকল্পনা সম্পৰ্কত কাম কৰি আছে।
