আজি এক কাৰ্যসূচীত মণিপুৰৰ প্ৰথম ৰবট আৰ্হি নিৰ্মাণকাৰী ছাত্ৰ থিয়াম নন্দলালক সম্বৰ্ধনা জনোৱা হয়। নন্দলাল ইম্ফল চহৰৰ জনষ্ট’ন উচ্চতৰ মাধ্যমিক বিদ্যালয়ৰ ছাত্ৰ।
বিদ্যালয় কৰ্তৃপক্ষ আৰু ইনফৰমেইচন চেণ্টাৰ ফৰ হিল এৰিয়াজ মণিপুৰৰ যুটীয়া উদ্যোগত আয়োজিত এই সম্বৰ্ধনা অনুষ্ঠানত ৰাজ্যৰ বিদ্যালয় শিক্ষা বিভাগৰ সঞ্চালক কিৰণ কুমাৰ আৰু ইনফৰমেইচন চেণ্টাৰ ফৰ হিল এৰিয়াজ মণিপুৰৰ মুখ্য উপদেষ্টা কাংগুজম মধুমংগলে অংশ গ্ৰহণ কৰে।
২০১৭ চনৰ ৰাজ্যিক বিজ্ঞান প্ৰদৰ্শনীত প্ৰথমস্থান দখল কৰা জনষ্ট’ন উচ্চতৰ মাধ্যমিক বিদ্যালয়ৰ একাদশ শ্ৰেণীৰ বিজ্ঞান শাখাৰ ছাত্ৰ নন্দলালে ১৯ জানুৱাৰিৰ পৰা হ’ব লগা আঞ্চলিক বিজ্ঞান প্ৰদৰ্শনীত অংশ গ্ৰহণ কৰিব।
বিষ্ণুপুৰ জিলাৰ নাম্বোল বালাৰাম খুন মেনিং লেইকাইৰ থিয়াম ইশ্ব’ৰচান্দ আৰু থিয়াম চাওবিৰ ৬ টা সন্তানৰ দ্বিতীয়তম নন্দলালে আজিৰ অনুষ্ঠানতে তেওঁৰ ৰবট জন ১৭ (JON 17) ও প্ৰদৰ্শন কৰে।
JON 17 ৰ JO য়ে JOHNSTONE, Nএ NANDALAL আৰু 17 ই 2017 চনক বুজাইছে।
চিৰিঞ্জ, হৰ্লিকচৰ বটল, বৈদ্যুতিক সামগ্ৰী, ম’বাইল ফোনৰ অংশ, এল ই ডি লাইট আৰু অন্যান্য পেলনীয়া সামগ্ৰীৰে তৈয়াৰ কৰা এই ৰবটটো সাজি উলিয়াবলৈ তেওঁক ১৫ ৰ পৰা ২০ দিনমান সময় লাগিছিল।
নন্দলালে কয়, ‘এখন ইংৰাজী চিনেমা চোৱাৰ পিছত মই ৰবটটো সজাৰ কাম আৰম্ভ কৰিছিলো। ৰবট ব্যৱহাৰ কৰি মই আমাৰ চৌপাশটো পৰিষ্কাৰ কৰি ৰাখিব খোজো।’ তেওঁ লগতে কয়, ‘প্ৰথমে মোক মা-দেউতাই ইয়াক লৈ বহু গালি পাৰিছিল।’
নন্দলালৰ প্ৰচেষ্টাৰ শলাগ লৈ শিক্ষা সঞ্চালক কিৰণ কুমাৰে কয় যে নন্দলালৰ উদ্ভাৱনমূলক আৰ্হি প্ৰশংসাযোগ্য কিন্তু বিভাগটোৱে কেৱল এজন নন্দলালক নহয় বৰঞ্চ বিদ্যালয় সমূহৰ বহু বিলাক নন্দলালকে মনোযোগ দিব লগা হয়।
সেয়ে তেওঁ কয় যে শিক্ষক সকলে আৰু অধিক নন্দলালৰ বিকাশ কৰাৰ বাবে নিত্য নতুন উদ্ভাৱনী প্ৰচেষ্টাৰে আগবাঢ়ি আহিব লাগিব।
