গুৱাহাটী মহানগৰীৰ পৰা চুৰি হোৱা বুলেট মটৰচাইকেল বি টি এডিত মাত্ৰ ২০ হাজাৰ টকাত বিক্ৰী হয়। এই কথা পোহৰলৈ আহিছে আজি অসম আৰক্ষীৰ স্পিচিয়েল টাস্ক ফ’ৰ্চৰ এটা দলে আটক কৰা চাৰিজন দুৰ্ধৰ্ষ মটৰচাইকেল আৰু গাড়ী চোৰৰ স্বীকাৰোক্তিত।
আটকাধীন দুৰ্ধৰ্ষ চোৰ কেইজনক ক্ৰমে জিতেন দাস, ৰাহুল বসুমতাৰী, হবিবুৰ ৰহমান আৰু অজয় চৌধুৰী বুলি আৰক্ষীয়ে চিনাক্ত কৰিছে। এই চাৰি দুৰ্ধৰ্ষ চোৰে গুৱাহাটী মহানগৰীৰ বিভিন্ন স্থানৰ পৰা প্ৰায় ২০০ তকৈও অধিক গাড়ী চুৰ কৰিছে বুলি আৰক্ষীৰ আগত স্বীকাৰ কৰে।
অসম আৰক্ষীৰ স্পিচিয়েল টাস্ক ফ’ৰ্চৰ এজন বিষয়াই জনোৱা অনুসৰি তেওঁলোকে টাটা ডি আই, বলেৰ’ পিকআপ, ৰয়েল এণ্ডফিল্ডকে ধৰি বিভিন্ন ধৰণৰ গাড়ী মটৰচাইকেল গুৱাহাটী মহানগৰীৰ বিভিন্ন স্থানৰ পৰা চোৰ কৰি চুৰি বাহন সমূহ নাগালেণ্ড মণিপুৰ আৰু বি টি এডিৰ বিভিন্ন স্থানলৈ সৰবৰাহ কৰি আহিছিল। লগতে বিষয়াজনে কয় এই চাৰি দুৰ্ধৰ্ষ চোৰে বৃহৎ সংখ্যক লোকক চুৰি বাহন সমূহ সীমান্ত পাৰাপাৰ কৰিবৰ বাবে নিয়োগ কৰি ৰাখিছে।
আনহাতে গুৱাহাটী মহানগৰীৰ একাংশই এয়া অসম আৰক্ষীৰ এক বৃহৎ সাফল্য বুলি উল্লেখ কৰে।
