মানৱ সৰবৰাহ কৰা চক্ৰ উৎখাত : নাবালিকাক উদ্ধাৰ

কালি চলোৱা এটা অভিযানত গহপুৰ আৰক্ষী মানৱ সৰবৰাহ কৰা এটা চক্ৰক উৎখাত কৰিবলৈ সক্ষম হয়। আৰক্ষীয়ে চক্ৰটোৰ কবলৰ পৰা এজনী নাৱালিকাকো উদ্ধাৰ কৰে। আৰক্ষীয়ে চক্ৰটোৰ জিয়াৰুল হক নামৰ এজনক গ্ৰেপ্তাৰ কৰে যদিও আনকেইজন পলাই সাৰে। আৰক্ষীয়ে জানিবলৈ দিয়ামতে জিয়াৰুল হকৰ নেতৃত্বত এই চক্ৰটোৱে প্ৰধানকৈ গ্ৰামাঞ্চলৰ ছোৱালী আৰু চাহ জনগোষ্ঠীৰ ছোৱালীক লক্ষ্য কৰি লৈছিল। চক্ৰটোৱে এই ছোৱালীবোৰ দিল্লী আৰু মুম্বাইলৈ যোগান দিছিল বুলি জানিব পৰা গৈছে। ধৃত জিয়াৰুল হকে উক্ত নাবালিকা ছোৱালীক দিল্লী চালান দিয়াৰ কথা আছিল। হকে ভুৱা প্ৰেমৰ সম্পৰ্কৰে এই ছোৱালীজনীক নিজৰ সৈতে ৰাখিছিল। ছোৱালীজনীক উদ্ধাৰ কৰি স্বাস্থ্য পৰীক্ষাৰ বাবে প্ৰেৰণ কৰা হৈছে বুলি জানিব পৰা গৈছে। আৰক্ষীয়ে লগতে চক্ৰটোৰ পলাতক সদস্যসকলক গ্ৰেপ্তাৰ কৰাৰ চেষ্টা কৰি আছে।