মিজোৰাম-অসম সীমান্তৰ বিবদমান এলেকাত অসম আৰক্ষীৰ লাঠীচালনাত আজি বৃহস্পতিবাৰে আহত হৈছে মিজো সৰ্বোচ্চ ছাত্ৰ সংগঠন মিজো জিৰলাই পল (Mizo Zirlai Pawl)ৰ সদস্য আৰু দুজন মিজো সাংবাদিককে ধৰি ১৫ জন লোক।
মিজোৰামৰ কলাচিব জিলাৰ অসম-মিজোৰাম সীমান্তৰ কাষৰীয়া বাইৰাবি চহৰৰ ওচৰৰ বিবদমান এলেকাত মিজো ছাত্ৰ সংস্থাৰ প্ৰায় ৭০ গৰাকী সদস্যই আজি পুৱা এটা জিৰণি চ’ৰা নিৰ্মাণ কৰিবলে চেষ্টা কৰোঁতে অসম আৰক্ষীয়ে বাধা প্ৰদান কৰি লাঠীচালনা কৰে।
আৰক্ষীৰ লাঠীচালনাত ঘটনাথলীত উপস্থিত প্ৰায় ২০ গৰাকী লোক আহত হয়। আহতসকলৰ ১৫ গৰাকীক কাষৰীয়া বাইৰাবিৰ ৰাজহুৱা স্বাস্থ্য কেন্দ্ৰলৈ লৈ যোৱা হয়।
হাইলাকান্দিৰ জিলা দণ্ডাধীশে এলেকাটোত ১৪৪ ধাৰা জাৰি কৰি মিজো ছাত্ৰসকলক বাধা দিবলৈ অসম আৰক্ষীৰ প্ৰায় ৫০০ গৰাকী জোৱান নিয়োগ কৰিছিল।
উল্লেখযোগ্য যে স্থানীয় গঞাৰ সহযোগত ছাত্ৰ সংগঠনটোৱে যোৱা ২৭ ফেব্ৰুৱাৰিত নিৰ্মাণ সম্পূৰ্ণ কৰা চ’ৰাটো সেই ৰাতিয়ে অসম আৰক্ষী আৰু অসমৰ বন বিভাগৰ লোকে ভাঙি দিয়া বুলি অভিযোগ উত্থাপিত হৈছিল।
অসম আৰক্ষীৰ লাঠীচালনাক লৈ উত্তেজনাপূৰ্ণ হৈ পৰিছে মিজোৰামৰ বাইৰাবি চহৰৰ পৰিস্থিতি। ‘জিৰণি চ’ৰাটো পুনৰ নিৰ্মাণ নোহোৱালৈকে বা মিজোৰাম আৰু অসম চৰকাৰে বিষয়টো প্ৰশাসনীয় মেজলৈকে ননালৈকে আমি ঘৰলৈ নোভতো’ বুলি ঘোষণা কৰিছে মিজো ছাত্ৰ সংস্থাৰ নেতা এল ৰামদিনলিয়ানা ৰেন্থেলেই।
‘জিৰণি চ’ৰাটো পুনৰ নিৰ্মাণ নকৰালৈকে আমাৰ অধিকাৰ থকা সেই মাটিডোখৰতে আমি শিবিৰ পাতি থাকিম’ বুলি ঘোষণা কৰি মিজো ছাত্ৰ নেতাজনে কয়, ‘ঠাইডোখৰৰ বাবদ মিজোৰাম চৰকাৰক সম্পূৰ্ণ ভূমি ৰাজহ আৰু কৰ দি থকা হৈছে যিটোৱে প্ৰমাণ কৰে যে ই মিজোৰামৰ (অন্তৰ্গত)।’
তেওঁ লগতে কয়, ‘বৃটিশ্ব শাসনে আন্তঃৰাজ্যিক বনাঞ্চলসমূহক জন নিষিদ্ধ অঞ্চল (no man’s land) হিচাপে ৰাখিছিল যাতে মিজো জনজাতিসকল ভৈয়ামৰ আগ্ৰাসী লোকসকলৰ সৈতে সংমিশ্ৰিত হোৱাৰ পৰা ৰক্ষা পৰে। এতিয়া অসম আৰক্ষী আৰু বন বিভাগে চব ঠাইতে সংৰক্ষিত এলেকাসমূহ বেদখল কৰি সেইবোৰ তেওঁলোকৰ বুলি দাবী কৰিছে।’
বিষয়টোক লৈ এতিয়ালৈকে মিজোৰাম চৰকাৰ মুখ খোলা নাই। পৰিস্থিতিত অধিক বেয়াৰ ফালে ঢাল খোৱাৰ আশংকাত মিজোৰামৰ গৃহ মন্ত্ৰীয়ে মিজো ছাত্ৰ সংগঠনটোৰ নেতাসকলক জিৰণি চ’ৰাটো পুনৰ নাসাজিবলৈ আহ্বান জনাইছে।
মিজোৰামৰ প্ৰথম গৰাকী মুখ্য মন্ত্ৰী চ চুংগাৰ পত্নীয়ে ছাত্ৰ সংগঠনটোক দান দিয়া উক্ত খেতি পথাৰখনত খেতিয়কসকলৰ জিৰণিৰ বাবে সংগঠনটোৱে জিৰণি চ’ৰাটো নিৰ্মাণ কৰিছিল।
মিজোভাষী সকলো জাতীয় ছাত্ৰ সংগঠন ১৯৩৫ চনত শ্বিলঙত প্ৰতিষ্ঠা হোৱা মিজো জিৰলাই পলৰ অন্তৰ্গত। এই মিজো জিৰলাই পল নেছ’ (North-East Students’ Organisation)ৰ সদস্য।
