বলীউদৰ বঁটাপ্ৰাপ্ত চলচ্চিত্ৰ ‘লান্সবক্স’ৰ প্ৰযোজক শ্বাহনাব আলমে প্ৰযোজনা কৰা প্ৰথমখন অসমীয়া চলচ্চিত্ৰ মুক্তিৰ বাবে সাজু হৈ উঠিছে। শ্বাহনাবে প্ৰযোজনা কৰা ‘ভগা খিড়িকি’ নামৰ এই চলচ্চিত্ৰখন পৰিচালনাৰ দায়িত্বত আছে অসমৰ এগৰাকী প্ৰসিদ্ধ ছবি নিৰ্মাতা জাহ্ন বৰুৱা।
বাস্তৱ জীৱনৰ কিছু ঘটনাৰ আলমত ছবিখনৰ কাহিনী ৰচনা কৰা হৈছে। ছবিখনৰ দুটি মুখ্য চৰিত্ৰত অভিনয় কৰিছে জেৰিফা ৱাহিদ আৰু সীমা বিশ্বাসে। অসমৰ কাজিৰঙা, বোকাখাত আৰু গুৱাহাটীৰ বিভিন্ন লোকেশ্বনত ‘ভগা খিড়িকি’ৰ চিত্ৰগ্ৰহণ কৰা হৈছে।
অসমৰ সন্তান প্ৰযোজক শ্বাহনাব আলমে বহুদিনৰ পৰাই এখন অসমীয়া ছবি নিৰ্মাণৰ কথা ভাৱি আছিল। অসমৰ ভাষা, সংস্কৃতি তথা পৰম্পৰাৰ সৈতে ঘনিষ্ঠ সম্পৰ্ক থকা আলমৰ এই ছবিখনে অসমীয়া চলচ্চিত্ৰত এক নতুন মাত্ৰা প্ৰদান কৰাৰ সম্ভাৱনা আছে।
এগৰাকী প্ৰসিদ্ধ ছবি নিৰ্মাতা তথা পৰিচালক জাহু বৰুৱাৰ সৈতে কাম কৰি শ্বাহনাব অত্যন্ত সুখী আৰু আৱেগ বিহ্বল হৈ পৰা বুলি তেওঁ প্ৰকাশ কৰিছে।
