যোৱা ২০১৪ চনৰ লোকসভা নিৰ্বাচনত ভাৰতৰ ভোটাৰসকলে এটা ব্যতিক্ৰম ধৰণৰ নিৰ্বাচনী অভিযানৰ মুখামুখি হৈছিল। সেয়া আছিল ডিজিটেল মাধ্যমত কৰা জোৰদাৰ প্ৰচাৰ। ৰাজনৈতিক দলবোৰে ভোটাৰৰ কাষ চাপিবৰ বাবে পৰম্পৰাগত মাধ্যমবোৰতকৈ ছ’চিয়েল মিডিয়াক বেছি ব্যৱহাৰ কৰিছিল।
ঘাইকৈ বিজেপিয়ে নিৰ্বাচনী প্ৰচাৰৰ ক্ষেত্ৰত ছ’চিয়েল মিডিয়াক অধিক গুৰুত্ব সহ লৈছিল। ছচিয়েল মিডিয়াৰ যোগেদি সহজ আৰু প্ৰান্তীয় অঞ্চলতো প্ৰচাৰ চলোৱাৰ সুবিধা লৈছিল দলটোৱে। তাৰ সুফলো পাইছিল দলটোৱে। তাৰ পিছৰ প্ৰায় সকলো নিৰ্বাচনতে প্ৰায়বোৰ দলৰ বাবেই ডিজিটেল মিডিয়া হৈ পৰিছে অন্যতম প্ৰচাৰ মাধ্যম।
অলপতে নিৰ্বাচন হ’ব লগীয়া মেঘালয়ৰ নিৰ্বাচনী প্ৰচাৰ অভিযানতো এই ছবি প্ৰতিফলিত হৈছে। ৰাজ্যখনৰ বিভিন্ন দলে সামাজিক মাধ্যম আৰু আন আন ডিজিটেল মাধ্যমক গুৰুত্ব সহকাৰে লোৱা দেখা গৈছে। আটাইকেইটা প্ৰদান দলৰে টুইটাৰ, য়ু টিউব, ফেচবুক আৰু ইনষ্ট্ৰাগ্ৰামত সবল উপস্থিতি দেখা গৈছে।
কংগ্ৰেছৰ মুকুল চাংমাক ছিচিয়েল মিডিয়াত সঘনে তেওঁৰ নিৰ্বাচনী প্ৰচাৰৰ ভিডিঅ’, ফটো আপডেইট দি থকা দেখা গৈছে। তেওঁৰ শেহতীয়া এটা ফেচবুক আপডেইট আছিল এনে ধৰণৰ : “We Meghalayans are strong. But we must also realize that true strength is keeping everything together when everyone expects us to fall apart. We must ensure that we stay united, not divided. They will try, but will fail. We shall overcome!”
এনে বাৰ্তাৰ যোগেদি তেওঁ কেৱল ভোটাৰকে লক্ষ্য কৰা নাই, বিৰোধীৰ প্ৰতিও শক্তিশালী বাৰ্তা প্ৰেৰণ কৰিছে।
আনহাতে যোৱা শুকুৰবাৰৰ এটা পোষ্টত তেওঁ লিখিছে, ‘যদি তেওঁলোকে আমাৰ বিষয়ে অসত্য প্ৰচাৰ বন্ধ কৰে, আমি তেওঁলোকৰ সঁচা কথাবোৰ কোৱা বন্ধ কৰিম।’
প্ৰায়বোৰ দলৰে প্ৰধান নেতাবোৰে নিজৰ নিজৰ বাৰ্তা ভোটাৰলৈ প্ৰেৰণ কৰিবলৈ নিজৰ ডিজিটেল প্লেটফৰ্ম বা পেইজ সৃষ্টি কৰি ব্যৱহাৰ কৰা দেখা গৈছে। এই পেইজবোৰৰ নামবোৰো দিয়া হৈছে একোটা একোটা শ্ল’গানৰ দৰে, যেনে- ‘I support Mukul Sangma’, ‘Not my NPP’, We need change in Meghalaya’, ‘We care for Meghalaya’ আদি।
দলবোৰে উন্নত মানৰ অডিঅ’-ভিডিঅ’ আৰু ইমেইজ প্ৰস্তুত কৰিবলৈ উন্নত মানৰ টুল ব্যৱহাৰ কৰা দেখা গৈছে।
আনহাতে এন পি পিৰ কনৰাড চাংমাই Wave of NPP নামৰ এটা ৫ মিনিটীয়া ভিডিঅ’ৰ জৰিয়তে মুকুল চাংমাক এজন একনায়কত্ববাদী নেতা বুলি দেখুৱাবৰ চেষ্টা কৰিছে।
কনৰাড চাংমাৰ দলটোৱে তেওঁলোকৰ ছ’চিয়েল মিডিয়াৰ পোষ্টবোৰৰ জৰিয়তে কংগ্ৰেছ চৰকাৰখনৰ ব্যৰ্থতাবোৰ, যেনে- মহিলাৰ বিৰুদ্ধে বৰ্ধিত অপৰাধ, নিয়োগহীনতা আদি দাঙি ধৰি কংগ্ৰেছ দলটোক বিব্ৰত কৰিছে। দলটোৰ পেইজৰ এটা পোষ্টত কোৱা হৈছে- “Crimes against women have increased in Meghalaya and tragically the conviction rate is very low. We must all come together to change mind-sets and overhaul the system to put an end to this!”
বৰ সুবিধা কৰিব নোৱৰা ৰাষ্ট্ৰীয় দল বিজেপিয়ে ডিজিটেল মাধ্যমত প্ৰধান মন্ত্ৰী মোদীৰ নেতৃত্বত হোৱা বিকাশ আৰু উন্নয়নৰ ছবি দেখুৱাবৰ যত্ন কৰিছে। দলটোৱে কংগ্ৰেছৰ বিফলতাবোৰো দাঙি ধৰাৰ চেষ্টা কৰিছে।
বিজেপি থকা সত্ত্বেও কংগ্ৰেছ আৰু এন পি পি দলে পৰস্পৰকে ডিজিটেল মাধ্যমত মূল লক্ষ্য হিচাপে লোৱা দেখা গৈছে।
