এইচ আই ভি পজিটিভ সংক্ৰান্তীয় ঘটনাৰ ক্ষেত্ৰত মেঘালয় আৰু মণিপুৰে এক উদ্বেগজনক দিশত গতি কৰিছে। এইক্ষেত্ৰত বেজীৰে লোৱা নিষিদ্ধ দ্ৰাগছেই গুৰুত্বপূৰ্ণ ভূমিকা পালন কৰিছে যদিও ইয়াৰ লগতে ব্যৱসায়িক যৌন সম্পৰ্কয়ো ইন্ধন যোগাইছে। স্বাস্থ্য মন্ত্ৰালয়ৰ এক শেহতীয়া প্ৰতিবেদনত এই কথা প্ৰকাশ পাইছে। ভাৰতবৰ্ষত যদিও সামগ্ৰিকভাৱে এই মাৰাত্মক ভাইৰাছবিধৰ সংক্ৰমনৰ হাৰ হ্ৰাস পাইছে, উত্তৰ পূৰ্বাঞ্চলৰ ৰাজ্যকেইখনত এই বিষয়টো চিন্তনীয় হৈ পৰিছে।
এইচ আই ভি ছেন্টিনেল চাৰ্ভাইলেন্স ৰিপ’ৰ্ট ২০১৬-১৭ ত প্ৰকাশ পোৱা মতে মিজোৰাম, নাগালেণ্ড, মেঘালয়, ত্ৰিপুৰা আৰু মণিপুৰত দেশৰ ভিতৰতে গৰ্ভৱতী মহিলাৰ ক্ষেত্ৰত এইচ আই ভি সংক্ৰমণৰ হাৰ সৰ্বাধিক। মণিপুৰত বাহিৰে বাকী ৰাজ্যকেইখনত ভাইৰাছটো সংক্ৰমণৰ ক্ষেত্ৰত পূৰ্বৰ তুলনাত অধিক ঘটনা বৃদ্ধি পাইছে।
গোটেই দেশতে এইচ আই ভি সংক্ৰমণৰ ক্ষেত্ৰত বেজীৰে দেহত লোৱা দ্ৰাগছৰ ঘটনা বৃদ্ধি পাইছে। প্ৰতিবেদনখনত কোৱা হৈছে যে বিশ্লেষণৰ পৰা তথ্য অনুসৰি প্ৰব্ৰজিত দম্পতীৰ সৈতে সম্পৰ্ক ৰখা গৰ্ভৱতী মহিলাৰ ক্ষেত্ৰত এইচ আই ভি সংক্ৰমণৰ হাৰ বিহাৰ, উত্তৰ প্ৰদেশ, ৰাজস্থান, উৰিষ্যা, মণিপুৰ আৰু নাগালেণ্ডত অধিক।
প্ৰতিবেদনখনত কোৱা হৈছে যে মণিপুৰ আৰু নাগালেণ্ডত প্ৰব্ৰজিত দম্পতীৰ সৈতে থকা গৰ্ভৱতী মহিলাৰ এইচ আই ভি সংক্ৰমণৰ ঘটনা অপ্ৰব্ৰজিত দম্পতীৰ সৈতে থকাসকলৰ তুলনাত দুইৰ পৰা তিনি শতাংশ অধিক।
