মেঘালয়ৰ ৰাজনীতিত এটা নতুন মোৰ দি শাসনাধিষ্ঠিত মৰ্চা মেঘালয় ডেম’ক্ৰেটিক এলায়েন্সৰ অংশীদাৰ হৈ থকা দুজন বিধায়কে আজি এটা নতুন মৰ্চা গঠন কৰিছে। এই নতুন মৰ্চাটোৰ নাম দিয়া হৈছে মেঘালয় য়ুনাইটেড ফ্ৰণ্ট।
নতুন মৰ্চা গঠন কৰা বিধায়ক দুজন হ’ল গামবিগ্ৰী সমষ্টিৰ এন চি পিৰ বিধায়ক চালেং এ চাংমা আৰু নংক্ৰেম সমষ্টিৰ নিৰ্দলীয় বিধায়ক লাম্বৰ মালজিয়াং।
উল্লেখযোগ্য যে চালেং আৰু লাম্বৰে মুখ্য মন্ত্ৰী কনৰাড চাংমাৰ এন পি পি নেতৃত্বাধীন মেঘালয়ৰ বৰ্তমানৰ মৰ্চা চৰকাৰখনক সমৰ্থন কৰি আছে।
মৰ্চাটো গঠন সম্পৰ্কত চালেঙে কয় যে একেটা দলৰে অন্তৰ্ভুক্ত হোৱা আৰু পৰস্পৰক সহায় কৰাৰ উদ্দেশ্যেই এইটো গঠন কৰা হৈছে।
মন কৰিব লগীয়া যে শাসনাধিষ্ঠিত মৰ্চা চৰকাৰখন এন পি পি, য়ু ডি পি, পি ডি এফ, এইচ্ছ এছ পি ডি পি, বিজেপি, এন চি পি আৰু নিৰ্দলীয় বিধায়কৰ দ্বাৰা গঠিত।
ৰাজ্যখনৰ ৬০খন আসনযুক্ত বিধানসভাত শাসনাধিষ্ঠিত মৰ্চাত অধ্যক্ষকে ধৰি মুঠ ৩৫ জন বিধায়ক আছে।
