দেশৰ উচ্চতম ন্যায়ালয়ৰ নিৰ্দেশ অনুসৰি সমগ্ৰ দেশৰ লগতে নগাঁও জিলাতো পুৰণি বাণিজ্যিক তথা ব্যক্তিগত যান-বাহনসমূহত উচ্চ সুৰক্ষাযুক্ত পঞ্জীয়ন (HSRP) নম্বৰ প্লেট লগাবলৈ নগাঁও জিলা পৰিবহন বিষয়াই আহ্বান জনাইছে।
শুকুৰবাৰে সংবাদ মাধ্যমৰ আগত জিলা পৰিবহন বিষয়া ৰূপক পূজাৰীয়ে জানিবলৈ দিয়ে যে, ৩১ আগষ্টৰ ভিতৰত এই সুৰক্ষাযুক্ত নম্বৰ প্লেট লগোৱাতো বাধ্যতামূলক কৰা হৈছে।
বিষয়াগৰাকীয়ে জনোৱা মতে, উচ্চতম ন্যায়ালয়ৰ নিৰ্দেশ অনুসৰি আৰু অসম চৰকাৰৰ পৰিবহন বিভাগৰ আদেশমৰ্মে নগাঁও জিলাত পুৰণি যান-বাহনৰ উচ্চ সুৰক্ষাযুক্ত নম্বৰ প্লেট লগোৱাৰ প্ৰক্ৰিয়া আৰম্ভ কৰা হৈছে।
উক্ত নিৰ্দ্ধাৰিত সময়ৰ ভিতৰত এই নম্বৰ প্লেট নলগালে যান-বাহনৰ গৰাকীৰ বিৰুদ্ধে উচ্চতম ন্যায়ালয়ৰ নিৰ্দেশ অনুসৰি বিভাগীয়ভাৱে কঠোৰ ব্যৱস্থা গ্ৰহণ কৰা হ’ব বুলি বিষয়া গৰাকীয়ে জানিবলৈ দিছে।
উল্লেখযোগ্য যে যান-বাহনৰ এই সুৰক্ষাযুক্ত নম্বৰ প্লেট নতুন গাড়ীসমূহত লগোৱা হৈছে যদিও পুৰণি যান-বাহনসমূহত বহুতেই এই নম্বৰ প্লেট লগোৱা নাই। সেয়েহে সুৰক্ষাৰ দিশটোৰ প্ৰতি লক্ষ্য ৰাখি আৰু উচ্চতম ন্যায়ালয়ৰ নিৰ্দেশক অনুসৰণ কৰি নগাঁও জিলাৰ পৰিবহন কৰ্তৃপক্ষই যান-বাহনৰ গৰাকীসকলক এই আহ্বান জনাইছে।
