গুৱাহাটীস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰক সঁচা অৰ্থত আন্তঃৰাষ্ট্ৰীয় পৰ্য্যায়ৰ বন্দৰলৈ উন্নীত কৰা হ’ব। এই ঘোষণা কৰিছে মুখ্য মন্ত্ৰী সৰ্বানন্দ সোণোৱালে।
এই উন্নীতকৰণ প্ৰক্ৰিয়াত ইয়াৰ পেছেঞ্জাৰ টাৰ্মিনেলকে ধৰি অন্যান্য দিশবোৰৰ সংস্কাৰ সাধন কৰা হ’ব। তাৰ পাছত ইয়াৰ বায়ুপথক আছিয়ান দেশবোৰৰ সৈতে সংযোগ কৰা হ’ব। মুখ্য মন্ত্ৰীজনে কোৱা মতে এই উন্নীতকৰণ প্ৰক্ৰিয়া সম্পূৰ্ণ হোৱাৰ পিছত বাংলাদেশ, নেপাল, ভুটান আৰু ছিংগাপুৰকে ধৰি মুঠ নখন দেশৰ সৈতে সংযোগ কৰা হ’ব।
উল্লেখযোগ্য যে চৰকাৰৰ এই পৰিকল্পনাৰ কথা মুখ্য মন্ত্ৰীজনে যোৱা ফেব্ৰুৱাৰিৰ প্ৰথম ভাগতে অনুষ্ঠিত বিশ্ব বিনিয়োগকাৰী সন্মিলনৰ প্ৰচাৰৰ সময়ত বেংগালুৰুত অনুষ্ঠিত এটা ৰ’ড শ্ব’ত উল্লেখ কৰিছিল।
মুখ্য মন্ত্ৰীজনে কয় যে লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰটোৰ পেছেঞ্জাৰ টাৰ্মিনেলটো বৰ্তমানৰ ২০০০ লোকৰ পৰিৱৰ্তে ৬০০০ লোকে ব্যৱহাৰ কৰিব পৰাকৈ উন্নীত কৰা হ’ব, য’ত বিভিন্ন অত্যাধুনিক সা-সুবিধাবোৰ থাকিব।
মন কৰিব লগীয়া যে যদিও লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰটোক আন্তঃৰাষ্ট্ৰীয় বিমানবন্দৰ হিচাপে স্বীকৃতি দিয়া আৰু নামকৰণ কৰা হৈছে, ইয়াৰ পৰা দেশৰ বাহিৰলৈ বিমানসেৱা এই পৰ্য্যন্ত নাই বুলিব পাৰি।
