‘ৰাষ্ট্ৰীয় চলচ্চিত্ৰ বঁটাত ৰীমা দাসৰ ‘ভিলেজ ৰকষ্টাৰ্ছ আৰু উৎপল বৰপূজাৰীৰ ইশ্বুলে আমালৈ যি গৌৰৱ কঢ়িয়াই আনিছে তাৰ বাবে মই এই দুয়ো গৰাকী পৰিচালককে আন্তৰিক অভিনন্দন জনাইছো। অসমীয়া চলচ্চিত্ৰৰ যি দক্ষতা, দৃঢ়তা আৰু সৌন্দৰ্য আছে সি এতিয়া প্ৰমাণিত হৈছে। আগন্তুক দিনত আমাৰ উঠি অহা ছবি নিৰ্মাতা সকলে কেৱল বলিউডে নহয়, হলিউড জয় কৰা চিনেমা নিৰ্মাণ কৰি অসমলৈ গৌৰৱ কঢ়িয়াই অনাৰ বাবে প্ৰচেষ্টাত ব্ৰতী হ’ব লাগিব।’
আজি শ্ৰীমন্ত শংকৰদেৱ কলাক্ষেত্ৰৰ আন্তৰ্জাতিক প্ৰেক্ষাগৃহত অসম ৰাজ্যিক চলচ্চিত্ৰ নিগম পৰিসীমিতৰ উদ্যোগত আৰু অসম চৰকাৰৰ সাংস্কৃতিক সঞ্চালকালয়ৰ সহযোগত সদ্যঘোষিত ৰাষ্ট্ৰীয় চলচ্চিত্ৰ বঁটাত অসমলৈ বিভিন্ন শিতানত গৌৰৱ কঢ়িয়াই অনা বঁটা বিজয়ী সকলক সম্বৰ্ধনা জনোৱাৰ উদ্দেশ্যে আয়োজিত অনুষ্ঠানত মুখ্য অতিথি হিচাপে অংশ গ্ৰহণ কৰি মুখ্য মন্ত্ৰী সৰ্বানন্দ সোণোৱালে এইদৰে কয়।
অনুষ্ঠানত মুখ্য মন্ত্ৰী গৰাকীয়ে এই চলচ্চিত্ৰ দুখনৰ জৰিয়তে বিশ্বৰ বিভিন্ন প্ৰান্তৰ জনসাধাৰণে অসমৰ প্ৰকৃতি, ৰীতি-নীতি, আচাৰ-ব্যৱহাৰ আদিৰ বিষয়ে জ্ঞাত হৈছে বুলি কয়।
ভিলেজ ৰকষ্টাৰ্ছৰ জৰিয়তে শিশু শিল্পী সকলে ছয়গাঁৱৰ নাম বিশ্বৰ বুকুত প্ৰতিষ্ঠিত কৰিছে বুলি উল্লেখ কৰি এই ছবিখনে অসমৰ গ্ৰাম্য সমাজৰ উপযুক্ত প্ৰতিফলন ঘটাইছে বুলিও মুখ্য মন্ত্ৰী গৰাকীয়ে কয়।
অনুষ্ঠানত অসম ৰাজ্যিক চলচ্চিত্ৰ নিগম পৰিসীমিতৰ অধ্যক্ষ যতীন বৰাই মুখ্য মন্ত্ৰী নিৰ্দেশৰ ভিত্তিত নিগমৰ অধীনত ৰাজ্যৰ চলচ্চিত্ৰৰ উন্নয়নৰ দিশত বহু সংখ্যক পদক্ষেপ গ্ৰহণ কৰি থকা হৈছে বুলি উল্লেখ কৰে।
অনুষ্ঠানত মুখ্য মন্ত্ৰীয়ে ভিলেজ ৰকষ্টাৰ্ছৰ পৰিচালিকা তথা স্বৰ্ণ কমল বঁটা লাভ কৰা ৰীমা দাসক ৰাজ্য চৰকাৰৰ তৰফৰ পৰা সম্বৰ্ধনা জনোৱাৰ উপৰি ২ লাখ টকাৰ চেক প্ৰদান কৰে। একেদৰে ৰজত কমল বঁটা লাভ কৰা ইশ্বু ছবিৰ পৰিচালক উৎপল বৰপূজাৰীক সম্বৰ্ধনা জনোৱাৰ উপৰি ১.৫ লাখ টকাৰ চেক প্ৰদান কৰে।
তাৰোপৰি মুখ্য মন্ত্ৰী গৰাকীয়ে শ্ৰেষ্ঠ শিশু শিল্পী বঁটা লাভ কৰা ভনিতা দাস আৰু শ্ৰেষ্ঠ লোকেশ্যনেল চাউণ্ড ৰেৰ্কডিষ্টৰ বঁটা লাভ কৰা শিল্পী গৰাকীকো ৫০ হাজাৰ টকাৰ চেক প্ৰদান কৰাৰ লগতে সম্বৰ্ধনা জ্ঞাপন কৰে। লগতে ছবি দুখনৰ আন আন শিল্পী সকলক মুখ্য মন্ত্ৰী গৰাকীয়ে ২৫ হাজাৰ টকাৰ চেক প্ৰদান কৰাৰ লগতে সম্বৰ্ধনা জ্ঞাপন কৰে।
