হাইস্কুল শিক্ষান্ত পৰীক্ষাত ৯১.৫ শতাংশ নম্বৰেৰে উত্তীৰ্ণ জনপ্ৰিয় কণ্ঠ শিল্পী নাহিদ আফ্ৰিন
আজি ঘোষণা কৰা হ’ল বহু প্ৰত্যাশিত অসমৰ ২০১৮ বৰ্ষৰ হাইস্কুল শিক্ষান্ত পৰীক্ষাৰ ফলাফল। শিক্ষা জীৱনৰ সবাতোকৈ গুৰুত্বপূৰ্ণ পৰীক্ষা বুলি বিবেচনা কৰা হাইস্কুল শিক্ষান্ত পৰীক্ষাত সফলতাৰে উত্তীৰ্ণ হ’ল অসমৰ জনপ্ৰিয় কণ্ঠশিল্পী নাহিদ আফ্ৰিন ।
বিশ্বনাথৰ বাসিন্দা নাহিদে হাইস্কুল শিক্ষান্ত পৰীক্ষাত আটাইকেইটা বিষয়তে লেটাৰ নম্বৰসহ মুঠ ৫৪৯ নম্বৰ লাভ কৰি সুখ্যাতিৰে উত্তীৰ্ণ হয়।
লিটল ষ্টাৰ হাইস্কুলৰ পৰা ৯১.৫% নম্বৰেৰে উত্তীৰ্ণ হোৱা নাহিদৰ পিতৃ আনোৱাৰ আনছাৰি আৰু মাতৃ ফাতিমা আনছাৰীৰ লগতে বিদ্যালয়ৰ শিক্ষক-শিক্ষয়ত্ৰীসকলেও তেওঁৰ এই সাফল্যত আনন্দত আত্মহাৰা হোৱা পৰিলক্ষিত হৈছে।
ডিষ্টিংছন সহ উত্তীৰ্ণ হোৱা নাহিদে নিজৰ সাফল্যত সুখী বুলি মন্তব্য কৰি সংবাদ মাধ্যমৰ আগত কয় যে ভৱিষ্যতে তেওঁ অসমতে থাকি বিজ্ঞান শাখাত অধ্যয়ন কৰি নিজৰ সংগীত জীৱনৰ লগতে শিক্ষা জীৱন আগুৱাই লৈ যাব।
উল্লেখ্য যে ছ’নি টিভিৰ জৰিয়তে প্ৰচাৰ হোৱা সংগীতৰ জনপ্ৰিয় ৰিয়েলিটি শ্ব’ ইণ্ডিয়ান আইড’লৰ মঞ্চত নিজৰ প্ৰতিভাৰ উমান দি অহা নাহিদ এতিয়া অসমৰ সংগীত জগতৰ এক উজ্বল নক্ষত্ৰ। তেওঁ যি দৰে সংগীত ক্ষেত্ৰখনত সফলতাৰ শিখৰ পাবলৈ সক্ষম হৈছে তেনেদৰে শিক্ষা জীৱনতো যেণ সকলো সফলতা অৰ্জন কৰে এতিয়া তাকেই কামনা কৰিছে নাহিদ প্ৰেমীসকলে।