অসমৰ বিশিষ্ট পৰিৱেশবিদ পূৰ্ণিমা দেৱী বৰ্মনে কানাডাৰ ভেনকুভাৰত অনুষ্ঠিত হ’বলগীয়া ‘বাৰ্ডছ অব এ ফিডাৰ’ কাৰ্যসূচীত উপস্থিত থাকি নিৰ্দিষ্ট বিষয়ৰ ওপৰত ভাষণ প্ৰদান কৰিব। আগষ্ট মাহৰ ২৪ তাৰিখে এই বক্তৃতানুষ্ঠান অনুষ্ঠিত হ’ব।
ভাষণত পৰিৱেশবিদগৰাকীয়ে গাঁৱলীয়া মহিলাৰ সক্ৰিয় সহযোগিতাৰে অসমৰ হাড়গিলা চৰাইৰ (Leptoptilos dubius) সংৰক্ষণ কাৰ্যাৱলী কেনেদৰে আগবড়াই নিছিল সেই সম্পৰ্কে বৰ্ণনা কৰিব।
‘বাৰ্ডছ অব এ ফিডাৰ’ অনুষ্ঠানটোৰ পৃষ্ঠপোষক হৈছে ষ্টিৱাৰ্ডশ্বিপ চেণ্টাৰ ফ’ৰ ব্ৰিটিছ কলম্বিয়া।
পুৰ্ণিমা দেৱী বৰ্মনে তেওঁৰ ভাষণটো আগষ্টৰ ২৪ তাৰিখে সন্ধিয়া ৭-০০ বজাৰ পৰা ৯-০০ বজালৈ প্ৰদান কৰিব।
উল্লেখ্য যে অসমত হাড়গিলা চৰাই আৰু সিহঁতৰ বাসস্থান বিলসমূহ সংৰক্ষণ কৰাৰ বাবে গ্ৰহণ কৰা উদ্যোগৰ বাবে পূৰ্ণিমা দেৱী বৰ্মনক সেউজ অস্কাৰ হিচাপে পৰিচিত ‘হুইটনি পুৰস্কাৰ’ প্ৰদান কৰা হৈছিল।
উল্লেখ্য যে হাড়গিলা হৈছে এবিধ ডাঙৰ আকৃতিৰ মৃতভোজী পক্ষী আৰু সমগ্ৰ বিশ্বত ইহঁতৰ সংখ্যা হৈছে মাথোঁ ১,২০০। ইয়াৰে ৭৫ শতাংশ হাড়গিলাৰ বসতিস্থল হৈছে অসম।
প্ৰকৃতি সংৰক্ষণৰ হ’কে আন্তৰ্জাতিক সংস্থাৰ মতে হাড়গিলাৰ মুঠ সংখ্যা হৈছে প্ৰায় ১,২০০ ৰ পৰা ১,৮০০ৰ ভিতৰত আৰু প্ৰায় ৮০০ টা হাড়গিলা অসমত আৰু ১৫৬টা বিহাৰত বাস কৰে।
