ছিকিম প্ৰদেশৰ ভাৰতীয় জনতা পাৰ্টীৰ ভাতৃ সংগঠন যুৱ মৰ্চাই অহা ২৩ আৰু ২৪ ফেব্ৰুৱাৰিত দুদিনীয়া কাৰ্যসূচীৰে জিলা কালেক্টৰেট বিভাগৰ সন্মুখত এক ধৰ্ণা কাৰ্যসূচী ৰূপায়ন কৰিব। আজি পূব ছিকিমৰ চিংতামত অৱস্থিত যুৱ মৰ্চাৰ মাণ্ডলিক কাৰ্যালয়ত আয়োজিত এক আলোচনাৰ অন্তত এই সিদ্ধান্ত গ্ৰহণ কৰে।
উল্লখ্য যে আজি অনুষ্ঠিত বৈঠকত ৰাজ্যিক সভাপতি ডিবি চৌহান, যুৱ কাৰ্যকৰী সভাপতি লাটেন ছেৰপাৰ লগতে মৰ্চাৰ অন্যান্য বিষয়ববীয়াৰ লগতে বিভিন্ন নেতা উপস্থিত আছিল।
বিজেপিয়ে প্ৰকাশ কৰা এখন প্ৰেছ বিবৃতিৰ জৰিয়তে জানিবলৈ দিয়ে যে ৰাজ্যখনত সংঘটিত হোৱা ৰামপণ্ট দুৰ্নীতিৰ বিৰুদ্ধাচৰণ কৰাৰ উদ্দেশ্যে এই ধৰ্ণা কাৰ্যসূচী গ্ৰহণৰ সিদ্ধান্ত লোৱা হৈছে। ইয়াৰ উপৰি ৰাজ্যখনত অভাৱনীয় হাৰত বৃদ্ধি পোৱা নিবনুৱা সমস্যা সন্দৰ্ভত ৰাজ্য চৰকাৰে কোনো বিহিত ব্যৱস্থা নোলোৱা তথা অন্য স্পৰ্শকাতৰ সমস্যা সমূহ নিষ্পত্তি নকৰাৰ অভিযোগ উত্থাপন কৰিয়েই এই প্ৰতিবাদী কাৰ্যসূচী লোৱা হয় বুলি জনায় ৰাজ্যিক সমিতিয়ে।
আনহাতে গিয়ালছিং বাৰমিয়ক সমষ্টিৰ বিভিন্ন অঞ্চলৰ আঞ্চলিক দলৰ পৰা অৰ্জুন চুব্বা আৰু ৰাজীৱ চুব্বাৰ নেতৃত্বত প্ৰায় ২০ জন যুৱ নেতাই আজি ভাৰতীয় জনতা পাৰ্টীত যোগদান কৰে বুলিও বিবৃতিযোগে প্ৰকাশ কৰে।
বিবৃতিখনত আৰু উল্লেখ আছে যে পূব জিলাৰ পাৰ্টী অধ্যক্ষই সংগঠনটোৰ নতুন সদস্যসকলক শপত বাক্য পাঠ কৰোৱায়।
মদন কাৰ্কী আৰু গোপাল প্ৰধানক পূব জিলাৰ উপ সভাপতি, জিগদেল ভূটিয়াক কোষাধ্যক্ষ, শান্তি শৰ্মা আৰু এলপি আচাৰ্য্যক যুটীয়া সম্পাদক আৰু এছকে শাস্ত্ৰীক সাধাৰণ সম্পাদক ৰূপে দায়িত্ব প্ৰদান কৰা হয়।
