ব’ৰ্ড অব স্প’ৰ্টছ, অসম অৰ্থাৎ অসম ক্ৰীড়া ব’ৰ্ডৰ কৰ্মচাৰীসকলে সপ্তম দৰমহা আয়োগৰ প্ৰতিবেদনৰ ভিত্তিত ৰাজ্যৰ আন চৰকাৰী কৰ্মচাৰীৰ সমহাৰত দৰমহা প্ৰদানৰ বাবে ৰাজ্য চৰকাৰক অন্তিম সময়সীমা নিৰ্ধাৰণ কৰি দিছে।
ইতিমধ্যে এই সম্পৰ্কত অসম ক্ৰীড়া ব’ৰ্ড কৰ্মী সংঘৰ তৰফৰ পৰা ক্ৰীড়া ব’ৰ্ডৰ অধ্যক্ষ তথা মুখ্য মন্ত্ৰী সৰ্বানন্দ সোণোৱাল, ক্ৰীড়া ব’ৰ্ডৰ সম্পাদক, জ্যেষ্ঠ শ্ৰম আয়ুক্ত, আয়ুক্ত সচিব আৰু ক্ৰীড়া আৰু যুৱ কল্যাণ বিভাগৰ সঞ্চালকক এখন দাবী পত্ৰ প্ৰেৰণ কৰে।
এই দাবী পত্ৰত বিগত তিনিটা বছৰ ধৰি ব’ৰ্ডৰ কৰ্মচাৰীসকলে ষষ্ঠ দৰমহা আয়োগৰ আঁসোৱাহ সমূহ দূৰ কৰি দৰমহা সংশোধন কৰিবলৈ বহুবাৰ আবেদন কৰাৰ পাছতো কৰ্মচাৰীসকলক উপেক্ষা কৰি অহা বুলি স্পষ্ট ৰূপত উল্লেখ আছে। উক্ত সংশোধনী অনুসৰি এতিয়া দৰমহা প্ৰদান নকৰাত চৰম হতাশাত ভুগিছে কৰ্মচাৰীসকল।
ইয়াৰ আশু সমাধান কৰিবলৈ উক্ত দাবী পত্ৰত কৰ্তৃপক্ষৰ ওচৰত সজোৰে দাবী উত্থাপন কৰে আৰু আন চৰকাৰী কৰ্মচাৰীৰ সমহাৰত দৰমহা প্ৰদান কৰিবলৈ দাবী জনায়। অন্যথা কৰ্মী সংঘই অহা ১ জুনৰ পৰা পৰ্যায় ক্ৰমে আন্দোলন কাৰ্যসূচী গ্ৰহণ কৰাৰ ভাবুকি দিয়ে।
উল্লেখ্য যে গুৱাহাটী নেহৰু ষ্টেডিয়ামত কৰ্মৰত ব’ৰ্ডৰ কৰ্মচাৰীসকলে ৰাজ্য চৰকাৰৰ নিম্নতম মজুৰি আইনৰ দ্বাৰা অনুমোদিত মজুৰিতকৈ কম পৰিমাণে পাৰিশ্ৰমিক গ্ৰহণ কৰিব লগা হৈছে।
