ৰাষ্ট্ৰীয় চলচ্চিত্ৰ বঁটা ঘোষণা : দেশৰ শ্ৰেষ্ঠ ৰীমা দাসৰ অসমীয়া ছবি ভিলেজ ৰ’কষ্টাৰ

২০১৮ বৰ্ষৰ ৰাষ্ট্ৰীয় চলচ্চিত্ৰ বঁটাসমূহ ঘোষণা কৰা হৈছে। ৬৫ সংখ্যক এইবাৰৰ ৰাষ্ট্ৰীয় চলচ্চিত্ৰ বঁটাত অসমীয়া ছবিয়ে আজুৰি আনিছে শ্ৰেষ্ঠ কাহিনী ছবিৰ সন্মানকে ধৰি মুঠ পাঁচটাকৈ বঁটা।

ৰাষ্ট্ৰীয় চলচ্চিত্ৰ বঁটাৰ শ্ৰেষ্ঠ কাহিনী ছবিৰ বঁটা লাভ কৰিছে অসমীয়া চলচ্চিত্ৰ ৰীমা দাসৰ ভিলেজ ৰ’কষ্টাৰে। এটি সৰু ছোৱালীৰ ডাঙৰ সপোনক কেন্দ্ৰ কৰি নিৰ্মাণ কৰা ভিলেজ ৰ’কষ্টাৰ ৰীমা দাসৰ এখন বহু চৰ্চিত ছবি। দহ বছৰীয়া ধুনুৰ নিজৰ এটা ৰ’কবেণ্ড গঠনৰ ইচ্ছাক সহযোগ কৰিছিল ল’ৰাৰ এটা দলে আৰু আছিল তাইৰ বিধৱা মাকৰ পৰা পোৱা অফুৰন্ত উৎসাহ। কিন্তু সমাজৰ বাধা-নিষেধৰ মাজত আৰম্ভ হৈছিল কাহিনীৰ সংঘাত।

ৰীমাৰ দাসৰ ভিলেজ ৰ’কষ্টাৰে ৰাষ্ট্ৰীয় পৰ্যায়ত শ্ৰেষ্ঠ চলচ্চিত্ৰৰ স্বৰ্ণকমল বঁটা লাভ কৰা ভিলেজ ৰ’কষ্টাৰে লগতে লাভ কৰিছে আৰু আন তিনিটাকৈ বঁটা। ছবিখনত অভিনয় কৰা শিশু শিল্পী ভনিতা দাসে লাভ কৰিছে শ্ৰেষ্ঠ শিশু শিল্পীৰ বঁটা।  ছবিখনে শ্ৰেষ্ঠ সম্পাদনা আৰু শ্ৰেষ্ঠ অডিঅ’গ্ৰাফীৰ বঁটাও লাভ কৰিছে।

আনহাতে আঞ্চলিক ভাষাৰ শ্ৰেষ্ঠ ছবিৰ শিতানত অসমীয়া ভাষাৰ বাবে এই বঁটা লাভ কৰিছে উৎপল বৰপূজাৰী পৰিচালিত ইশু ছবিখনে।

কাহিনী ছবিৰ বাবে বিচাৰক মণ্ডলীৰ মুৰব্বী শেখৰ কাপুৰে আজি ৰাষ্ট্ৰীয় চলচ্চিত্ৰ বঁটা সমূহ ঘোষণা কৰে।