আলফাৰ সৈতে চৰকাৰৰ শান্তি আলোচনাৰ প্ৰথমটো প্ৰয়াসৰ সময়ত গঠিত পি চি জিৰ অন্যতম সদস্য ৰেৱতী ফুকন যোৱা ২২ এপ্ৰিলৰ পৰা নিৰুদ্দেশ হৈ আছে যদিও আজি পৰ্য্যন্ত বিশিষ্ট নাগৰিকজনৰ কোনো শুংসূত্ৰ উলিয়াব পৰা নাই চৰকাৰ তথা আৰক্ষীয়ে। বহুতে ফুকনক ৰাজনৈতিক কাৰণত অপহৰণ কৰা হৈছে বুলি সন্দেহ ব্যক্ত কৰি আহিছে। আনকি প্ৰাক্তন মুখ্য মন্ত্ৰী তৰুণ গগৈয়েও ৰেৱতী ফুকন সন্দৰ্ভত এনে সন্দেহ ৰাজহুৱাকৈ ব্যক্ত কৰিছিল। সন্দেহৰ আঙুলি উঠিছিল কেন্দ্ৰীয় চোৰাংচোৱা সংস্থাবোৰৰ প্ৰতিও।
কিন্তু যোৱা সোমবাৰে আলোচনাপন্থী আলফাৰ এটা প্ৰতিনিধি দল আলফা-কেন্দ্ৰীয় চৰকাৰৰ মাজত চলি থকা শান্তি আলোচনাৰ অংশ স্বৰূপে হোৱা বৈঠকত বহিছিল, য’ত শান্তি আলোচনাটোৰ মধ্যস্থতাকাৰী এ বি মাথুৰ, কেন্দ্ৰীয় চৰকাৰৰ গৃহ বিভাগৰ যুটীয়া সচিব আৰু আলফাৰ সভাপতি অৰবিন্দ ৰাজখোৱা, সাধাৰণ সম্পাদক অনুপ চেতিয়া আৰু প্ৰচাৰ সম্পাদক মিথিংগা দৈমাৰীয়ে অংশগ্ৰহণ কৰিছিল।
অৰবিন্দ ৰাজখোৱাই সংবাদ মাধ্যমৰ আগত জনোৱামতে, বৈঠকত শান্তি আলোচনাৰ মূল বিষয় দাবী চনদৰ ওপৰত আলোচনা হোৱাৰ লগতে সন্ধানহীন ৰেৱতী ফুকনৰ প্ৰসংগটোও আলোচনা কৰা হৈছিল।
কেন্দ্ৰীয় চৰকাৰৰ প্ৰতিনিধিকেইজনে এইটো নিশ্চিত কৰিছে যে বহুতে সন্দেহ কৰাৰ দৰে ফুকনক কেন্দ্ৰীয় চৰকাৰৰ চোৰাংচোৱাই অপহৰণ কৰা নাই।
উল্লেখযোগ্য যে সন্ত্ৰাসবাদ জৰ্জৰিত উত্তৰ-পূবত কেন্দ্ৰীয় চোৰাংচোৱাৰ সক্ৰিয়তা আৰু অতীতত চলি অহা ব্যাপক গুপ্তহত্যাত কেন্দ্ৰীয় চৰকাৰৰ চোৰাংচোৱা সংস্থাবোৰৰ ভূমিকাক সকলোৱে সন্দেহৰ চকুৰে চাই আহিছে। এইবোৰত কেন্দ্ৰীয় চোৰাংচোৱা সংস্থাবোৰৰ ভূমিকা থকাটো এটা প্ৰায় সকলো জনা গুপ্তসত্য (অপেন ছিক্ৰেট)।
আনহাতে ৰেৱতী ফুকনৰ পুতেক কৌশিক ফুকনেও সংবাদ মাধ্যমৰ আগত পৰেশ বৰুৱাক আলোচনাৰ মেজলৈ আনিবলৈ চেষ্টা কৰি থকা বাবে তেওঁৰ দেউতাকক ৰাজনৈতিক কাৰণত অপহৰণ কৰা হৈছে বুলি মুকলিকৈ সন্দেহ ব্যক্ত কৰিছিল।
আলফা (স্বাঃ) সেনাধ্যক্ষ পৰেশ বৰুৱায়ো ফুকনক অপহৰণ কৰা বুলি সন্দেহ ব্যক্ত কৰি সংবাদ মাধ্যমলৈ নিজৰ মত প্ৰেৰণ কৰিছিল।
এইবোৰৰ লগতে আলোচনা পন্থী আলফাৰ দ্বাৰাই চৰকাৰৰ সহযোগত ৰেৱতী ফুকনক অপহৰণ কৰা হৈছে বুলিও গুজৱ ওলাইছিল, যিটো অৰবিন্দ ৰোজখোৱাই অস্বীকাৰ কৰিছিল।
কিন্তু অৰবিন্দ ৰাজখোৱাই এই কথাটোত কেন্দ্ৰীয় চোৰাংচোৱাৰ দ্বাৰা এনে কৰা হোৱা নাই বুলি দিয়া স্পষ্টীকৰণে বিশেষ তাৎপৰ্য্য বহন কৰিছে।
