পৰম্পৰা অটুট ৰাখি শনিবাৰে সামৰণি পৰা জোনবিল মেলাত মুখ্য অতিথিৰ ভাষণ দি মুখ্য মন্ত্ৰী সোণোৱালে কয় যে তেওঁ জাতীয় স্বাৰ্থত কোনো ধৰণৰ আপোচ নকৰে। তদুপৰি, নাগৰিকত্ব সংশোধনী বিধেয়কক লৈ একাংশই বিভ্ৰান্তিৰ সৃষ্টি কৰিছে বুলিও তেওঁ উল্লেখ কৰে।
জোনবিল মেলাৰ ৰাজদৰবাৰত ১৮ গৰাকী তিৱা ৰজাৰ লগতে মুখ্য অতিথি হিচাপে উপস্থিত থাকি মুখ্য মন্ত্ৰী সৰ্বানন্দ সোণোৱালে কয় যে নাগৰিকত্ব সংশোধনী বিধেয়কৰ দ্বাৰা অসমৰ ভাষা-কৃষ্টি সংস্কৃতি, জাতি-মাটিৰ প্ৰতি ভাবুকিৰ সৃষ্টি হোৱাৰ কোনো কাৰণ নাই।
মুখ্য মন্ত্ৰী সোণোৱালে জোনবিল মেলাৰ বিনিময় প্ৰথা ৰাজ্য চৰকাৰে সংৰক্ষণ কৰাৰ বাবে যথোপযুক্ত ব্যৱস্থা গ্ৰহণ কৰিব বুলিও ভাষণ প্ৰসংগত সদৰী কৰে। উক্ত অনুষ্ঠানতে মুখ্য মন্ত্ৰীয়ে মধ্য অসমৰ ১৮গৰাকী তিৱা ৰজাক এবছৰৰ বাবে ৬০ হাজাৰকৈ টকাৰ ৰাজভাত্তা আগবঢ়ায়।
জোনবিল মেলাৰ শনিবাৰৰ সামৰণি অনুষ্ঠানত মুখ্য মন্ত্ৰীৰ সৈতে উপস্থিত থাকে স্বাস্থ্য আৰু পৰিয়াল কল্যাণ দপ্তৰৰ ৰাজ্যিক মন্ত্ৰী তথা জাগীৰোড সমষ্টিৰ বিধায়ক পীয়ূষ হাজৰিকা, মৰিগাঁও সমষ্টিৰ বিধায়ক ৰমাকান্ত দেউৰী তথা জনপ্ৰিয় অভিনেতা যতীন বৰা।
আনহাতে, শনিবাৰে মুখ্য মন্ত্ৰী সোণোৱাল জোনবিল মেলালৈ আহি থকা সময়ত জাগীৰোডত কৃষক মুক্তি, জাতীয়তাবাদী যুৱ-ছাত্ৰ পৰিষদ আৰু আমছুৰ লগতে কেইবাটাও সংগঠনে ক’লা পতাকা প্ৰদৰ্শন কৰে।
মুখ্য মন্ত্ৰীক ক’লা পতাকা প্ৰদৰ্শন কৰা ১১জন প্ৰতিবাদকাৰীক আৰক্ষীয়ে আটক কৰে। আটক কৰা প্ৰতিবাদকাৰীসকলক জে’ল হাজোতলৈ প্ৰেৰণ কৰাৰ প্ৰস্তুতি চলাই থকা বুলি জানিব পৰা গৈছে।
