আফগানিস্তানৰ শাসকীয় তালিবান নেতৃত্বাধীন বাহিনীয়ে চুবুৰীয়া ৰাষ্ট্ৰ পাকিস্তানৰ কেইবাটাও অঞ্চলক লক্ষ্য কৰি আক্ৰমণ চলাইছে। আফগানিস্তানৰ প্ৰতিৰক্ষা মন্ত্ৰালয়ে দাবী কৰিছে যে পাকিস্তানে আফগান ভূখণ্ডত বিমান আক্ৰমণৰ কেইদিনমান পিছত শনিবাৰে এই প্ৰত্যা ক্ৰমণ সংঘটিত কৰিছে। কিন্তু দুয়োপক্ষৰ হতাহতি বা ক্ষতিৰ সবিশেষ তথ্য ততাতৈয়াকৈ এই আক্ৰমণত পোৱা নগ’ল।
অৱশ্যে চীনৰ চৰকাৰী সংবাদ সংস্থা ছিনহুয়াই প্ৰকাশ কৰা অনুসৰি সীমান্তত আফগান সামৰিক বাহিনীৰ সৈতে হোৱা সংঘৰ্ষত কমেও ১৯জন পাকিস্তানী সৈনিক আৰু তিনিজন আফগান সাধাৰণ নাগৰিক নিহত হৈছে। সংবাদ সংস্থা এ এফ পিয়ে জনায় যে শনিবাৰে চুবুৰীয়া ৰাষ্ট্ৰ আফগানিস্তান আৰু পাকিস্তানৰ মাজত সীমান্তৰ সংঘৰ্ষত এজন পাকিস্তানী জোৱান নিহত হয়।
দুয়োখন দেশৰ বিষয়াসকলে কয় যে পাকিস্তানৰ খাইবাৰ পখতুনখোৱা প্ৰদেশ আৰু আফগানিস্তানৰ খোষ্ট প্ৰদেশৰ মাজৰ সীমান্তৱৰ্তী অঞ্চলত দুয়োখন দেশৰ সীমান্তৰক্ষীৰ মাজত বিক্ষিপ্ত সংঘৰ্ষ সংঘটিত হৈছে। ৰয়টাৰে প্ৰকাশ কৰা অনুসৰি দুয়োখন দেশৰ সীমান্তৰক্ষী বাহিনীয়ে গধুৰ অস্ত্ৰ ব্যৱহাৰ কৰিছিল।
ইয়াৰ পূৰ্বে ২৫ ডিচেম্বৰত আফগানিস্তানৰ পাক্তিকা প্ৰদেশৰ কেইবাটাও অঞ্চলত পাকিস্তান সেনাই বিমান আক্ৰমণ চলাইছিল। আফগানিস্তানত এই আক্ৰমণত কমেও ৪৬ জন লোক নিহত হয়। ইয়াৰে অধিকাংশই আছিল মহিলা আৰু শিশু।
পাকিস্তানৰ বিমান আক্ৰমণত অসামৰিক লোকৰ মৃত্যুৰ প্ৰতিশোধ লোৱাৰ হুংকাৰ দিছিল আফগান তালিবানে। সেই অনুসৰি আফগানিস্তানে স্থানীয় সময় অনুসৰি শনিবাৰে পুৱা আফগানিস্তানৰ সীমান্তৰ সমীপৰ পাকিস্তানৰ খাইবাৰ পখতুনখোৱা প্ৰদেশৰ কেইবাটাও অঞ্চলত আক্ৰমণ চলায়।
পাকিস্তানৰ সীমান্তৱৰ্তী জিলা কুৰৰামত শনিবাৰে কমেও দুটা স্থানত সংঘৰ্ষৰ সৃষ্টি হয় বুলি এক জ্যেষ্ঠ সীমান্ত নিৰাপত্তাৰ সূত্ৰই জনায়। তেওঁ কয় যে এই এনকাউণ্টাৰত পাকিস্তান ফ্ৰন্টিয়াৰ কৰ্পছৰ এজন জোৱানৰ মৃত্যু হোৱাৰ লগতে আন সাতজন জোৱান আহত হোৱাৰ খবৰ পোৱা গৈছে।
ইপিনে, ছ’চিয়েল মিডিয়া এক্সত প্ৰেৰণ কৰা বাৰ্তাত আফগানিস্তানৰ প্ৰতিৰক্ষা মন্ত্ৰালয়ে কয় যে পাকিস্তানৰ সীমান্তৰ সিপাৰে “কেইবাটাও পইন্ট”, য’ৰ পৰা আফগানিস্তানত আক্ৰমণ চলোৱা হৈছিল, সেইবোৰ প্ৰতিশোধৰ লক্ষ্য কৰি লোৱা হৈছে।
আফগানিস্তানৰ খোষ্ট প্ৰদেশৰ এজন বিষয়াই সংবাদ সংস্থাক জনাইছে যে, “এই সংঘৰ্ষৰ ফলত সীমান্ত অঞ্চলৰ বাসিন্দাসকলে শনিবাৰে পুৱাই ঘৰৰ পৰা পলাবলৈ বাধ্য হয়। অৱশ্যে আফগান বাহিনীৰ মাজত হতাহতিৰ কোনো খবৰ পোৱা নাই।”
২০২১ চনত আফগানিস্তানত তালিবান ক্ষমতালৈ অহাৰ পিছৰে পৰা দুয়োখন চুবুৰীয়া দেশৰ মাজত উত্তেজনাপূৰ্ণ সম্পৰ্ক বিৰাজ কৰিছে। ইছলামবাদৰ অভিযোগ যে উগ্ৰপন্থীয়ে আফগানিস্তানৰ ভূখণ্ড ব্যৱহাৰ কৰি পাকিস্তানক আক্ৰমণ কৰিছে। অৱশ্যে আফগানিস্তানৰ শাসক গোট তালিবানে এই অভিযোগ অস্বীকাৰ কৰিছে।
চলিত বৰ্ষৰ মাৰ্চ মাহত পাকিস্তান-আফগানিস্তানৰ সম্পৰ্কই জটিল ৰূপ ধাৰণ কৰিছিল। সেই সময়ত পাকিস্তানী সেনাই আফগানিস্তানৰ ভূখণ্ডত দুবাৰকৈ বিমান আক্ৰমণ চলাইছিল। আফগানিস্তানত ৫ গৰাকী মহিলা আৰু শিশু নিহত হৈছিল।
আফগানিস্তানত তালিবান পুনৰ ক্ষমতালৈ অহাৰ পাছত পাকিস্তানৰ পশ্চিম সীমান্ত অঞ্চলত উগ্ৰপন্থী হিংসা ভয়ংকৰভাৱে বৃদ্ধি পাইছে। উগ্ৰপন্থীৰ পুনৰ উত্থান ৰোধৰ বাবে সংগ্ৰাম কৰি আছে ইছলামবাদে। কেৱল এইবাৰেই বিভিন্ন সংঘৰ্ষত ৩৮৩জন পাকিস্তানী জোৱান নিহত হৈছে বুলি দেশখনৰ সেনাবাহিনীয়ে প্ৰকাশ কৰিছে। একে সময়তে পাকিস্তানী সেনাই কমেও ৯২৫ জন উগ্ৰপন্থীক হত্যা কৰা বুলি প্ৰকাশ কৰিছে।
