পৰিয়ালৰ ইচ্ছাৰ বিৰুদ্ধে প্ৰেম কৰাৰ বাবে এহাল যুৱক-যুৱতীক তেওঁলোকে জীৱন্তে জ্বলাই দিয়াৰ দৰে এক জঘন্য ঘটনা সংঘটিত হৈছে।
উত্তৰ প্ৰদেশৰ বান্দাৰ মটোংধ থানাৰ অন্তৰ্গত কৰছা গাঁৱত সংঘটিত হৈছে এই অনাৰ কিলিঙৰ ঘটনা।
এই ঘটনাত যুৱক-যুৱতী দুয়োগৰাকীৰে মৃত্যু হৈছে। হাস্পাতললৈ নিয়াৰ পথতে প্ৰেমিক যুৱকজনৰ মৃত্যু হোৱাৰ পাছত হাস্পাতলত চিকিৎসাধীন অৱস্থাত প্ৰেমিকায়ো মৃত্যুক সাৱটি লয়।
অতি স্পৰ্শকাতৰ হৈ পৰা ঘটনাটোৰ পাছতে আৰক্ষীৰ ডিআইজি আৰু এছ পি গৈ কানপুৰ হাস্পাতলত উপস্থিত হয় আৰু তাত বৃহৎ সংখ্যক আৰক্ষী বাহিনী মোতায়েন কৰে।
বাতৰি অনুসৰি, গাঁৱখনৰে এগৰাকী যুৱকে সেই গাঁৱখনৰ যুৱতীগৰাকীৰ সৈতে প্ৰেমত পৰিছিল।
বুধবাৰে সন্ধিয়া যুৱতীগৰাকীয়ে প্ৰেমিকগৰাকীক লগ ধৰিবৰ বাবে নিজৰ ঘৰলৈ মাতিছিল। এই খৱৰ পৰিয়ালৰ লোকে কেনেবাকৈ জানিব পাৰে।
ক্ষুব্ধ হৈ প্ৰেমিকাৰ পৰিয়ালৰ লোকে দুয়োকে নিৰ্মমভাৱে প্ৰহাৰ কৰে আৰু তেওঁলোকক কোঠাৰ ভিতৰত সুমুৱাই বন্ধ কৰি জীৱন্তে জ্বলাই দিয়ে।
গুৰুতৰভাৱে আহত অৱস্থাত গাঁৱৰ আন লোকে তেওঁলোকক হাস্পাতলত ভৰ্তি কৰে যদিও দুয়োৰে মৃত্যু হয়।
ইপিনে মৃত যুৱকগৰাকীৰ পিতৃয়ে যুৱতীগৰাকীৰ পৰিয়ালৰ বিৰুদ্ধে ষড়যন্ত্ৰ কৰি মাতি নি তেওঁৰ পুত্ৰক হত্যা কৰা বুলি গুৰুতৰ অভিযোগ আনিছে।
আৰক্ষীয়ে এই ঘটনাৰ তদন্ত আৰম্ভ কৰিছে আৰু ৯জন লোকৰ বিৰুদ্ধে এজাহাৰ দাখিল কৰিছে।
আৰক্ষীয়ে যুৱতীগৰাকীৰ পিতৃ-মাতৃ আৰু ভাতৃকে ধৰি চাৰিজন লোকক ইতিমধ্যে গ্ৰেপ্তাৰ কৰিছে।
