অৰুণাচল প্ৰদেশৰ পশ্চিম কামেং জিলাৰ মাণ্ডালাৰ সমীপত আজি পুৱা দুৰ্ঘটনাত পতিত হোৱা ভাৰতীয় সেনাৰ হেলিকপ্টাৰখনৰ নিৰুদ্দিষ্ট দুয়োগৰাকী পাইলট নিহত হৈছে। উদ্ধাৰ অভিযানত দুয়োগৰাকীৰে মৃতদেহ উদ্ধাৰ কৰা হৈছে বুলি জানিব পৰা গৈছে।
নিহত পাইলট দুগৰাকী সেনাৰ এগৰাকী লেফটেনেণ্ট কৰ্ণেল আৰু আনগৰাকী মেজৰ ৰেংকৰ বিষয়া বুলি জানিব পৰা গৈছে। আজি পুৱা ৯:১৫ বজাত বিমানখনে এয়াৰ ট্ৰেফিক কণ্ট্ৰ’লাৰৰ সৈতে যোগাযোগ হেৰুৱাইছিল বুলি সেনাই এক বিবৃতিত সদৰী কৰিছিল।
ভাৰতীয় সেনা, সশস্ত্ৰ সীমা বল আৰু ভাৰত-তিব্বত সীমান্ত আৰক্ষীৰ পাঁচটা অনুসন্ধানকাৰী দলে দুৰ্ঘটনাগ্ৰস্ত হেলিকপ্টাৰখন তথা নিৰুদ্দিষ্ট সেনা বিষয়া দুগৰাকীৰ সন্ধানত অনুসন্ধান অভিযান আৰম্ভ কৰিছিল।
বিমানখনৰ ধ্বংসাৱশেষ মাণ্ডালাৰ পূব ভিলেজ বাংলাজাপৰ সমীপত উদ্ধাৰ হোৱা বুলি সেনাই সদৰী কৰিছে। দুৰ্ঘটনাৰ কাৰণ বৰ্তমান পৰ্যন্ত জানিব পৰা হোৱা নাই আৰু অনুসন্ধানৰ বাবে তদন্তৰ নিৰ্দেশ দিয়া হৈছে বুলি সেনাই লগতে কয়।
উল্লেখ্য যে, আজি পুৱা ৯ বজাত জিলাখনৰ সাংগে গাঁৱৰ পৰা অসমৰ শোণিতপুৰ জিলাৰ মিছামাৰী অভিমুখে যাত্ৰা কৰিছিল হেলিকপ্টাৰখন। প্ৰায় ৯.১৫ বজাত হেলিকপ্টাৰখন সৈতে এয়াৰ ট্ৰেফিক কণ্ট্ৰলৰ যোগাযোগ বিচ্ছিন্ন হয় বুলি নিশ্চিত কৰিছিল সেনাই।
বিশেষ তদন্ত কোষৰ আৰক্ষী অধীক্ষক ৰোহিত ৰাজবীৰ সিঙে জানিবলৈ দিয়া মতে দিৰাঙত দুৰ্ঘটনাগ্ৰস্ত হেলিকপ্টাৰখন জ্বলি থকা অৱস্থাত প্ৰত্যক্ষ কৰি স্থানীয় গাঁওবাসীয়ে জিলা প্ৰশাসনক খবৰ দিছিল।
