দেশৰ কোনো স্থানতো যেন সুৰক্ষিত নহয় নাৰী। সকলো স্থানতেই পুৰুষৰ যৌন শোষণ-নিৰ্যাতনৰ বলি হ’ব লগীয়া হৈছে নাৰীয়ে।
প্ৰধানমন্ত্ৰী নৰেন্দ্ৰ মোদীৰ বিখ্যাত শ্ল’গান ‘বেটী পঢ়াও, বেচী বচাও’ যেন কাৰ্যতঃ ব্যৰ্থ হৈছে দেশত।
সিটোৰ পিছত সিটো নাৰীৰ ওপৰত চলোৱা যৌন শোষণ-নিৰ্যাতন, ধৰ্ষণ আদি ঘটনাৰ খবৰে সংবাদ মাধ্যমৰ শিৰোণাম সদায়ে দখল কৰি আহিছে।
এইবাৰ কেব তথা টেক্সী চালকৰ যৌন উৎপীড়নৰ বলি হৈ দুগৰাকীকৈ মহিলাই চলন্ত গাড়ীৰ পৰা জঁপিয়াবলৈ বাধ্য হৈছে।
ঘটনাটো সংঘটিত হৈছে শনিবাৰে সন্ধিয়া পঞ্জাৱৰ অমৃচৰ চহৰত।
আৰক্ষীৰ সূত্ৰৰ খবৰ মতে শনিবাৰে সন্ধিয়া অমৃচৰত কেবৰ চালকে টেক্সীৰ ভিতৰতে যৌন উৎপীড়ন চলোৱাত বাধ্য হৈ দুগৰাকী মহিলাই চলন্ত বাহনৰ পৰাই জঁপিয়াই আহত হৈছে।
ঘটনাৰ পিছতে আৰক্ষীয় কেবখনৰ চালকজনক গ্ৰেপ্তাৰ কৰিছে।
আৰক্ষীৰ মতে কেবখনত তিনিগৰাকী মহিলা আছিল। দুগৰাকী মহিলাই চলন্ত গাড়ীখনৰ পৰা জঁপিয়াই দিয়া দেখি স্থানীয় লোকে কেবখন খেদি গৈ তৃতীয় গৰাকী মহিলাক উদ্ধাৰ কৰাৰ লগতে চালকজনক ধৰি আৰক্ষীৰ হাতত গতাই দিয়ে।
আৰক্ষী বিষয়া ৰবীণ হংসে সংবাদ মাধ্যমৰ আগত কয় যে সন্ধিয়া মহিলা তিনি গৰাকীয়ে চহৰখনৰ ৰঞ্জিত এভিনিউ এলেকাৰ এখন ৰেষ্টোৰেণ্টলৈ বুলি এখন কেবত গৈ আছিল আৰু তেতিয়াই চালকে এই কাণ্ডটো সংঘটিত কৰে।
“টেক্সীখনে যাত্ৰা আৰম্ভ কৰাৰ পিছতে চালকজনে তিনি গৰাকী মহিলাৰ এগৰাকীৰ ওপৰত যৌন আতিশৰ্য্য চলাবলৈ আৰম্ভ কৰে। মহিলা কেইগৰাকী বাধা দি চিঞৰ বাখৰ কৰিবলৈ আৰম্ভ কৰোঁতেই চালকজনে গাড়ীৰ স্পীড বঢ়াই দিয়ে। ইয়াৰ পিছতে চালকজনৰ পৰা নিজকে বচাবলৈ চলন্ত গাড়ীখনৰ পৰা জঁপিয়াই দিয়ে দুগৰাকী মহিলাই।” আৰক্ষী বিষয়া ৰবীণ হংসে কয়।
