হৰ্ছ ট্ৰেডিঙৰ নাটকৰ যৱনিকা! অসম পালেহি ২০ কংগ্ৰেছ মহাজোটৰ প্ৰাৰ্থী

হৰ্ছ ট্ৰেডিঙৰ আশংকাৰে ৰাজ্যৰ ৰাজনীতি উত্তাল হৈ থকাৰ মাজতেই আজি অসমলৈ বুলি উভটি আহিল কংগ্ৰেছ মহাজোটৰ ২০ প্ৰাৰ্থী।

বিয়লি প্ৰায় ৩ বজাত বৰঝাৰ বিমান বন্দৰত উপস্থিত হয় প্ৰাৰ্থীৰ দলটো।

ৰাজস্থানৰ আজমীৰ শ্বৰীফৰ পৰা বিমানযোগে ৰাওনা হয় দলটো।

AIUDF ৰ সাধাৰণ সম্পাদক তথা মানকাছাৰ সমষ্টিৰ মহাজোটৰ প্ৰাৰ্থী আমিনুল ইছলাম, ধিং সমষ্টিৰ বিধায়ক প্ৰাৰ্থী আমিনুল ইছলাম, ৰূপহী সমষ্টিৰ কংগ্ৰেছৰ প্ৰাৰ্থী নুৰুল হোডা, ভবানিপুৰ সমষ্টিৰ AIUDF প্ৰাৰ্থী ফণীধৰ তালুকদাৰকে ধৰি ২০ গৰাকী প্ৰাৰ্থী বিশেষ বিমানযোগে গুৱাহাটীত আহি উপস্থিত হয়।

গুৱাহাটীত উপস্থিত হোৱাৰ পাছত AIUDF ৰ সাধাৰণ সম্পাদক আমিনুল ইছলামে কয় “বিজেপিৰ মাজত হৰ্ছ ট্ৰেডিঙৰ পৰম্পৰা এটা আছে। আচলতে হৰ্ছ ট্রেডিংটো এক সস্তীয়া প্ৰচাৰ। আমাৰ মাজত অলপ হৰ্ছ ট্ৰেডিঙৰ আশংকা আছে যদিও চৰকাৰ যিহেতু মহাজোটে গঠন কৰিবই গতিকে ইয়াত হৰ্ছ ট্ৰেডিঙে ইমান প্ৰভাৱ নেপেলাব।”

ইপিনে, কংগ্ৰেছী বিধায়ক নুৰুল হুডাই হৰ্ছ ট্ৰেডিঙৰ আশংকাত ৰাজস্থান যোৱা নাছিল বুলি দাবী কৰাৰ লগতে তীৰ্থ ভ্ৰমণ বা অৱসৰ বিনোদনৰ বাবেহে ফুৰিবলৈ যোৱা বুলি দাবী কৰে।