গাজাৰ শ্বিফা হাস্পতালৰ সঞ্চালক ডাঃ মহম্মদ আবু ছালমিয়াই বিবিচিক জনাইছে যে যোৱা ৭২ ঘণ্টাত অঞ্চলটোত ২১টা শিশুৰ পুষ্টিহীনতা আৰু ভোকত মৃত্যু হৈছে।
তেওঁ জনাইছে যে গাজাৰ প্ৰায় ৯ লাখ শিশু ভোকত ভুগি আছে আৰু ইয়াৰে প্ৰায় ৭০ হাজাৰ শিশু পুষ্টিহীনতাৰ বলি হৈছে।
তেওঁলোকে মৃত্যুৰ আতংকজনক পৰিসংখ্যাৰ সন্মুখীন হোৱা, ডায়েবেটিছ আৰু বৃক্কৰ ৰোগী বিশেষভাৱে বিপদত পৰা বুলি সকীয়াই দিছে চিকিৎসকগৰাকীয়ে।
হামাছৰ পৰিচালিত স্বাস্থ্য মন্ত্ৰালয়ে পুষ্টিহীনতাৰ বাবে মৃত্যু হোৱা লোকৰ সংখ্যা সন্দৰ্ভত অধিক তথ্য প্ৰকাশ কৰিছে।
মন্ত্ৰালয়ৰ এগৰাকী মুখপাত্ৰই জনোৱা মতে, যোৱা ৪৮ ঘণ্টাত ১২টা শিশুসহ ৩৩জন লোকৰ মৃত্যু হৈছে।
তেওঁ কয় যে ২০২৩ চনত যুদ্ধ আৰম্ভ হোৱাৰ পিছৰে পৰা পুষ্টিহীনতাৰ ফলত মৃত্যু হোৱা লোকৰ মুঠ সংখ্যা ১০১ জন, ইয়াৰে ৮০ জন শিশু।একে সময়তে মে’ মাহৰ শেষৰ ফালে আমেৰিকা আৰু ইজৰাইল সমৰ্থিত গাজা হিউমেনিটেৰিয়ান ফাউণ্ডেশ্যনে (জি এইচ এফ) সাহায্য বিতৰণ আৰম্ভ কৰাৰ পিছৰে পৰা প্ৰায় প্ৰতিদিনে সাহায্য সামগ্ৰী লাভ কৰিবলৈ চেষ্টা কৰি থকা অৱস্থাত পেলেষ্টাইনীসকলক হত্যা কৰাৰ খবৰ আহিছে।
