নেপালত ২১ ডিচেম্বৰত সংঘটিত এক ভয়ানক পথ দুৰ্ঘটনাত ২৩ জনকৈ লোক নিহত হোৱাৰ লগতে ১৪ জনকৈ লোক আহত হয়। আহত লোক সকলক ৰাপ্তি জোনাল হাস্পাতালত ভৰ্তি কৰোৱা হয়।
উল্লেখযোগ্য যে নেপালৰ ঘোৰাইস্থিত কৃষ্ণা ইষুক পলিটেকনিক ইনষ্টিটিউটৰ শিক্ষাৰ্থী কঢ়িয়াই অনা এখন বাছে নেপালৰ দাঙৰ সমীপৱৰ্তী ৰাপ্তি ঘাইপথত নিয়ন্ত্ৰণ হেৰুৱাই পাহাৰৰ পৰা প্ৰায় ১৬০০ ফুট তলত পৰে। দুৰ্ঘটনাগ্ৰস্ত বাছখনত ৩৭ জনকৈ যাত্ৰী কঢ়িয়াই আনিছিল। য’ত ৩৪ গৰাকী শিক্ষাৰ্থীৰ লগতে দুগৰাকী শিক্ষকো আছিল।
নিহত ২৩ জন যাত্ৰীৰ ভিতৰত সৰহসংখ্যকে ১৬ৰ পৰা ২০ ৰ ভিতৰৰ শিক্ষাৰ্থী আছিল। দুৰ্ঘটনাটোত বাছখনত থকা দুগৰাকী শিক্ষকৰ লগতে চালকজনো নিহত হোৱা বুলি আৰক্ষী সূত্ৰৰ পৰা জানিব পৰা গৈছে।
আৰক্ষীয়ে দুৰ্ঘটনাটো বাছখনৰ তীব্ৰ বেগত অহাৰ বাবেই সংঘটিত হ’ব পাৰে বুলি সন্দেহ প্ৰকাশ কৰিছে। আনহাতে স্থানীয় ৰাইজে উক্ত স্থানত সঘনে দুৰ্ঘটনা হৈ থকা জনোৱাৰ লগতে ইয়াৰ মূল কাৰণ পথৰ জৰাজীৰ্ণ অৱস্থা বুলি কয়।
