সোমবাৰে কোকৰাঝাত মুখ্যমন্ত্ৰী হিমন্ত বিশ্ব শৰ্মাই জনসভা সম্বোধন কৰি বিটিআৰ প্রশাসন, বিভিন্ন বিভাগৰ মুৰব্বী বিষয়া আৰু ৰাজ্য চৰকাৰৰ শীৰ্ষ বিষয়াসকলৰ সৈতে এক বৈঠকত মিলিত হয়।
তেঁও বিটিআৰৰ অন্তৰ্গত কোকৰাঝাৰ বাওখুংৰী, দতমা, গোঁসাইগাঁও আৰু পৰ্বতঝোৰা সমষ্টিত ৰাজ্য চৰকাৰৰ বিকাশমুখী পাঁচখন আঁচনিৰ ফলপ্রসূ ৰূপায়ণৰ সন্দৰ্ভত বৈঠকত মিলিত হয়।
উল্লেখ্য যে, জিলাখনৰ পাঁচটা বিধানসভা সমষ্টিত অৰুণোদয় আঁচনিয়ে পূৰ্বতে ৬০ হাজাৰ গৰাকী হিতাধিকাৰীক সামৰি লৈছিল। মুখ্যমন্ত্ৰীয়ে কয় যে অৰুণোদয় ৩.০ ৰ এনে হিতাধিকাৰীৰ সংখ্যা ১ লাখ ৪০ হাজাৰলৈ বৃদ্ধি পাব।
জনসাধাৰণৰ কল্যাণার্থে ৰাজ্য চৰকাৰে গ্ৰহণ কৰা অৰুণোদয় ৩.০, মুখ্যমন্ত্রী মহিলা উদ্যমিতা আঁচনি, মুখ্যমন্ত্ৰীৰ আত্মনিৰ্ভৰ অসম অভিযান, এটি কলি দুটি পাত আঁচনি আৰু ৰেচন কাৰ্ড প্ৰদানৰ জৰিয়তে বিটিআৰৰ সকলো জনসাধাৰণ যাতে ফলপ্ৰসূ হ’ব পাৰে সেই বিষয়ে এই বৈঠকত গভীৰ ভাবে আলোচনা কৰে।
মুখ্যমন্ত্রীয়ে কয় যে আত্মনিৰ্ভৰ অসম অভিযানৰ অধীনত কোকৰাঝাৰ জিলাত প্রায় ৩ হাজাৰ যুৱক-যুৱতীয়ে ২ লাখ টকাকৈ লাভ কৰিব। এই বৈঠকতে এই আঁচনিৰ হিতাধিকাৰীৰ চূড়ান্ত তালিকাখনৰ সম্পৰ্কতো আলোচনা কৰা হয়।
মুখ্যমন্ত্রীয়ে জিলাখনত উদ্যমীসকলৰ বেংক সংযোগ বৃদ্ধিত গুৰুত্ব আৰোপ কৰে আৰু এই দিশত বিশেষ দৃষ্টি দিবলৈ জিলা আয়ুক্তক নির্দেশ দিয়ে। আঁচনিখনৰ ৰূপায়ণৰ উদ্দেশ্যে আধাৰ কাৰ্ড প্ৰ-পত্ৰ পূৰণ প্ৰক্ৰিয়া, ডাটা আপলোডৰ কাম আদিৰ অগ্রগতিৰো মুখ্যমন্ত্রীয়ে খতিয়ান লয়।
তাৰোপৰি, মুখ্যমন্ত্ৰীয়ে কয় যে এই আঁচনিখনৰ জৰিয়তে ১.৫ লাখ মহিলা উপকৃত হ’ব পাৰিব। বৈঠকত এটি কলি দুটি পাত আঁচনিখনৰ সম্পৰ্কতো আলোচনা কৰা হয়। এই আঁচনিৰ অধীনত জিলাখনৰ ৭ হাজাৰ চাহ বাগিচাৰ শ্রমিকে ৫ হাজাৰ টকাকৈ লাভ কৰিব। বৈঠকত ৰেচন কার্ড প্রদানৰ বিষয়টোও আলোচনা কৰা হয়। কোকৰাঝাৰ জিলাৰ পাঁচটা সমষ্টিত নতুনকৈ ৬০ হাজাৰ লোকে ৰেচন কার্ড লাভ কৰিব। মুখ্যমন্ত্ৰীয়ে ১৫ আগষ্টৰ ভিতৰত হিতাধিকাৰীৰ নিৰ্বাচনৰ প্ৰক্ৰিয়া সম্পূর্ণ কৰিবলৈ সংশ্লিষ্ট বিভাগসমূহক নির্দেশ দিয়ে।
