গুৱাহাটীৰ বৰঝাৰ বিমানবন্দৰত ৬৬৪ গ্ৰাম সোণ জব্দ; এজনক আটক

গুৱাহাটীত পুনৰ জব্দ কেইবা লক্ষাধিক টকা মূল্যৰ সোণ। এইবাৰ বৰঝাৰ বিমানবন্দৰৰ পৰা ৬৬৪ গ্ৰাম সোণ জব্দ কৰা হয়।

জব্দ কৰা সোণখিনিৰ মূল্য প্ৰায় ২৫.৭৫ লাখ টকা হ’ব বুলি জানিব পৰা গৈছে। বিমানবন্দৰত চি আই এছ এফে তালাচী চলাই থকাৰ সময়ত আজমত আলী নামৰ এজন যুৱকৰ পৰা এই সোণখিনি উদ্ধাৰ কৰে।

প্ৰাপ্ত তথ্য মতে আজমত আলীয়ে বিমানযোগে সোণখিনি দিল্লীলৈ সৰবৰাহৰ পৰিকল্পনা কৰিছিল। পিছত সোণসহ আজমত আলীক চি আই এছ এফে শুল্ক বিভাগক চমজাই দিয়ে।

উল্লেখযোগ্য যে বুধবাৰেও গুৱাহাটীত কেন্দ্ৰীয় ৰাজহ চোৰাংচোৱা বিভাগে এক অভিযান চলাই ১৮.৫ কিলো ওজনৰ সোণ জব্দ কৰিছিল।

এ এছ-বি এছ-৩৩৩০ নম্বৰৰ এখন ফ’ৰ্ড ইক’ স্পৰ্ট গাড়ীৰ পিছপিনৰ তলৰ অংশত বিশেষধৰণৰ ফুটা বনাই তাৰ ভিতৰত লুকুৱাই অনা উক্ত চোৰাং সোণখিনি গুৱাহাটীস্থিত DRI-ৰ এটা দলে জব্দ কৰিছিল।