শনিবাৰে ৰাজ্যৰ ৯ টা বৃহৎ চাহ কোম্পানী আৰু ২৫ খন ব্যক্তিগত বাগানে শ্রমিক-কৰ্মচাৰীৰ বাবে পূজাৰ বোনাচৰ কথা ঘোষণা কৰিছে।
অসম চাহ মজদুৰ সংঘৰ সাধাৰণ সম্পাদক ৰূপেশ গোৱালাই শনিবাৰে জানিবলৈ দিয়া মতে, বোনাচ ঘোষণা কৰা বৃহৎ কোম্পানী কেইটাৰ ভিতৰত ৰ’ছেল ইণ্ডিয়া, গুডৰিক, এণ্ডিউ য়ুলে, এমকে জকাই, জোকতলী লক্ষ্মী, ধনশিৰি, অসম কোম্পানী ইণ্ডিয়া লিমিটেড আৰু গিলাণ্ডাৰচ অৰ্বুথনাট অন্যতম।
বিশেষ সূত্ৰ মতে, এই কোম্পানী সমূহে দুৰ্গা পূজা উপলক্ষে ২০ শতাংশ বোনাচ আগবঢ়াব। ইয়াৰে কেইটামান কোম্পানিয়ে ১৫ শতাংশ আৰু ৫ শতাংশকৈ দুটা কিস্তিত বোনাচ প্ৰদান কৰিব।
স্মৰ্তব্য যে, অসম চাহ মজদুৰ সংঘই দুৰ্গা পূজাৰ ৩ সপ্তাহ আগতীয়াকৈ বোনাচ মুকলি কৰিবলৈ কোম্পানী সমূহলৈ আহ্বান জনাইছিল।
বোনাচ আদায় আইন,১৯৬৫ অনুসৰি বোনাচ আদায়ৰ নূন্যতম সীমা ৮.৩৩ শতাংশৰ পৰা উৰ্দ্ধতম সীমা ২০ শতাংশ বুলি তথ্যত প্ৰকাশ।
নূন্যতম ৩০ দিন কৰ্মস্থলীত উপস্থিত থকা সকলো স্থায়ী আৰু অস্থায়ী শ্রমিক-কৰ্মচাৰী য়ে এই বোনাচ লাভ কৰিব বুলি জানিব পৰা গৈছে।
