ঘূৰ্ণীবতাহ ‘চিত্ৰাং’য়ে সোমবাৰে মাজনিশা বাংলাদেশৰ উপকূলত খুন্দা মাৰে। ঘূৰ্ণীবতাহৰ প্ৰভাৱত ধাৰাসাৰ বৃষ্টিপাত হৈছে। এতিয়ালৈকে ১০ জন লোকৰ মৃত্যু হৈছে। তেওঁলোকৰ ভিতৰত একেটা পৰিয়ালৰ তিনিজন সদস্যও আছে।
ঘূৰ্ণীবতাহ চিত্ৰাঙৰ মূল কেন্দ্ৰটোৱে উপকূল অতিক্ৰম কৰি মূল ভূখণ্ডত প্ৰৱেশ কৰিছে। এতিয়ালৈকে কুমিল্লাত তিনিজন, ভোলাত দুজন, নৰেইলত এজন, বৰগুনাত এজন আৰু চিৰাজগঞ্জত দুজন লোকৰ মৃত্যু হৈছে।
লগতে পঢ়ক: ম্যানমাৰত কাচিন বিদ্ৰোহীৰ ওপৰত চলোৱা বিমান আক্ৰমণত নিহত ৫০ জন
নাৰায়ণগঞ্জৰ সোণাৰাগাঁও উপজিলাৰ ডোৰিকান্দি অঞ্চলত এডাল প্ৰকাণ্ড গছ বাগৰি পৰাৰ পিছত ঢাকা-চট্টগ্ৰাম ঘাইপথত যান-বাহনৰ চলাচল বন্ধ কৰি দিয়া হৈছে।
ইপিনে, ঘূৰ্ণীবতাহ চিত্ৰাঙে বাংলাদেশৰ কমেও ১৩ খন জিলা প্ৰভাৱিত কৰিছে। ঘূৰ্ণীবতাহৰ প্ৰভাৱত চট্টগ্ৰাম আৰু বৰিশালৰ অধীনৰ বেছিভাগ অঞ্চলত ধুমুহা বতাহৰ সৈতে ধাৰাসাৰ বৃষ্টিপাত হৈছে। ১৫ খন উপকূলীয় জিলাত নদীৰ পানীৰ স্তৰ বৃদ্ধি পাইছে। উপকূলীয় অঞ্চলৰ বহুতো বাসিন্দাক সুৰক্ষিত স্থানলৈ স্থানান্তৰ কৰা হৈছে।
বাংলাদেশ বতৰ বিজ্ঞান বিভাগৰ মতে ঘূৰ্ণীবতাহ পাৰ হোৱাৰ সময়ত উপকূলীয় অঞ্চলসমূহত ধুমুহাৰ গতি বেগ প্ৰতি ঘণ্টাত ৮০ৰ পৰা ১০০ কিলোমিটাৰ আছিল।
লগতে পঢ়ক: চুনাক ব্ৰিটেইনৰ মচনদত বহাৰ সময়তে নেটিজেনৰ দাবী-‘ঘুৰাই দিয়ক কহিনুৰ, মোদী, মালিয়াক’!
কক্সবজাৰ, চট্টগ্ৰাম, সাতখিৰা, খুলনা, বাগেৰহাট, পিৰোজপুৰ, বৰগুনা, ঝালোকতি, ভোলা, পাটুৱাখালি, লক্ষ্মীপুৰ, চান্দপুৰ, নোৱাখালি, ফেনি আৰু বৰিশালত আটাইতকৈ বেছি ক্ষতিৰ আশংকা কৰা হৈছে। ৰাজধানী ঢাকাত ধাৰাসাৰ বৰষুণৰ ফলত ৰাস্তাত পানী জমা হৈছে।
