বাজেট অধিবেশনৰ দ্বিতীয় পৰ্যায়ত দুয়োখন সদনতে গৃহীত বহু চৰ্চিত ‘অনুপ্ৰৱেশ আৰু বিদেশী নাগৰিক (সংশোধনী) বিধেয়ক’। ৰাষ্ট্ৰপতি দ্ৰৌপদী মুৰ্মুৰ স্বাক্ষৰ প্ৰদানৰ পিছত শনিবাৰে কেন্দ্ৰই যুগ যুগ ধৰি চলি অহা অনুপ্ৰৱেশ আইনখনৰ পৰিৱৰ্তন কাৰ্যকৰী কৰাৰ বাবে এক অধিসূচনা জাৰি কৰিছে।
বিৰোধীয়ে সংশোধিত অনুপ্ৰৱেশ আৰু বিদেশী নাগৰিক আইনত অভিবাসনৰ নামত দমন আৰু চৰকাৰৰ সমালোচনা প্ৰতিহত কৰাৰ ব্যৱস্থা বুলি অভিযোগ উত্থাপন কৰিছে। ইফালে কেন্দ্ৰই অনুপ্ৰৱেশ নীতি সৰল কৰি তোলা, ৰাষ্ট্ৰীয় নিৰাপত্তা সুদৃঢ় কৰা আৰু অপৰাধীক শাস্তি প্ৰদানৰ লক্ষ্যৰে এই নতুন আইনখন অনা হৈছে বুলি দাবী কৰিছে। কংগ্ৰেছ, তৃণমূল আৰু ইণ্ডিয়া মিত্ৰজোঁটৰ অন্যান্য দলমূহেও বিধেয়কখনে ‘সংবিধানত সন্নিৱিষ্ট মৌলিক অধিকাৰ খৰ্ব কৰা’ বুলি অভিযোগ উত্থাপন কৰিছে।
উল্লেখ্য যে এই নতুন আইন অনুসৰি যদি কোনো বিদেশী নাগৰিক বা অনপ্ৰৱেশকাৰীয়ে ভাৰতীয় চৰকাৰক সমালোচনা কৰাৰ ইতিহাস আছে, তেন্তে তেওঁৰ এই দেশত প্ৰৱেশ নিষিদ্ধ কৰা হ’ব। ইয়াৰ উপৰিও কিছুমান মানৱ অধিকাৰ সংগঠনে ৰোহিংগীয়া শৰণাৰ্থীক বিশেষভাৱে লক্ষ্য কৰি ল’ব বুলি আশংকা প্ৰকাশ কৰিছে।
নতুন আইন অনুসৰি যদি কোনো বিদেশীক বিপজ্জনক বুলি চিনাক্ত কৰা হয় তেন্তে ইমিগ্ৰেচন বিভাগে তেওঁৰ দেশত প্ৰৱেশ নিষিদ্ধ কৰিব পাৰে। সেই বিদেশী নাগৰিকজনক স্বদেশলৈ ঘূৰাই পঠোৱাটো ভাৰতে দায়িত্ব বহন নকৰে৷
নতুন বিধেয়কখনত পৰামৰ্শ দিয়া হৈছে যে বিশ্ববিদ্যালয়, চিকিৎসালয়, ঘৰৰ মালিককে ধৰি সকলো শিক্ষানুষ্ঠানে নিয়মিতভাৱে প্ৰশাসনক তেওঁলোকৰ সংস্পৰ্শলৈ অহা বিদেশীসকলৰ সবিশেষ তথ্য প্ৰদান কৰিব লাগে। বৈধ পাছপ’ৰ্ট-ভিছা অবিহনে ভাৰতত ধৰা পৰা সকলক ৫ লাখতকৈ অধিক নহয় জৰিমনা আৰু পাঁচ বছৰৰ কাৰাদণ্ডৰ পৰামৰ্শ দিয়া হৈছে। ভুৱা পাছপ’ৰ্ট-ভিছা লৈ ধৰা পৰিলে ১ৰ পৰা ১০ লাখ টকাৰ জৰিমনা আৰু দুইৰ পৰা সাত বছৰৰ কাৰাদণ্ডৰ পৰামৰ্শ দিয়া হৈছে। ইমিগ্ৰেচন বিষয়াৰ হাতত ৱাৰেণ্ট অবিহনে সন্দেহযুক্ত লোকক গ্ৰেপ্তাৰ কৰাৰ ক্ষমতাও প্ৰদান কৰিছে এই আইনে।
প্ৰসংগ ক্ৰমে দেশত প্ৰচলিত ‘বিদেশী নাগৰিক আইন ১৯৪৬’, ‘ইমিগ্ৰেচন (পৰিবহন সংস্থাৰ দায়বদ্ধতা) আইন ২০০০’, ‘পাছপ’ৰ্ট আইন ১৯২০’ আৰু ‘বিদেশী পঞ্জীয়ন আইন ১৯৩৯’ এই চাৰিখন আইনক একত্ৰিত কৰি ‘সংশোধিত অনুপ্ৰৱেশ আৰু বিদেশী নাগৰিক আইন’ প্ৰস্তুত কৰা হৈছে।
