চুলি সৰাৰ সমস্যা বহু কাৰণত হ’ব পাৰে। তাৰ ভিতৰত এটা হ’ল ভিটামিন আৰু খনিজ পদাৰ্থৰ অভাৱ। শৰীৰত অত্যাৱশ্যকীয় পুষ্টিকৰ উপাদানৰ অভাৱ হ’লে চুলিৰ স্বাস্থ্যৰ অৱনতি ঘটে আৰু চুলি সৰিবলৈ আৰম্ভ কৰে।
১) আইৰণঃ আমাৰ শৰীৰৰ লোহিত ৰক্তকণিকা উৎপাদনৰ বাবে আইৰণ অতি প্ৰয়োজনীয়, যিয়ে চুলিৰ গুৰিকে ধৰি শৰীৰৰ সকলো কোষলৈ অক্সিজেন কঢ়িয়াই লৈ যায়। যদি চুলিৰ গুৰিবোৰে পৰ্যাপ্ত পৰিমাণৰ অক্সিজেন আৰু পুষ্টিকৰ উপাদান নাপায় তেন্তে চুলিৰ বৃদ্ধিত ব্যাঘাত জন্মে আৰু চুলিবোৰ দুৰ্বল হৈ সৰিবলৈ আৰম্ভ কৰে। বিশেষকৈ মহিলাৰ চুলি সৰাৰ অন্যতম প্ৰধান কাৰণ হৈছে আইৰণৰ অভাৱত হোৱা ৰক্তহীনতা।
২) বায়’টিন বা ভিটামিন বি ৭: বায়’টিন বি কমপ্লেক্স ভিটামিনৰ এটা অংশ। কেৰাটিন নামৰ প্ৰটিন উৎপাদনত ই গুৰুত্বপূৰ্ণ ভূমিকা পালন কৰে। কেৰাটিন হৈছে আমাৰ চুলি, ছাল আৰু নখৰ মূল গাঁথনিগত উপাদান। বায়টিনে চুলিৰ স্বাস্থ্য বজাই ৰখাত সহায় কৰে, চুলিৰ বৃদ্ধি ত্বৰান্বিত কৰে, চুলি শক্তিশালী কৰে। বায়’টিনৰ অভাৱত কেৰাটিনৰ উৎপাদন হ্ৰাস পায়, যাৰ ফলত চুলি দুৰ্বল, ৰুক্ষ আৰু পাতল হৈ পৰে আৰু চুলি সৰা বৃদ্ধি পায়।
৩) জিংকঃ জিংক এবিধ অপৰিহাৰ্য খনিজ যিয়ে চুলিৰ কলাৰ বৃদ্ধি আৰু মেৰামতিৰ ক্ষেত্ৰত গুৰুত্বপূৰ্ণ ভূমিকা পালন কৰে। ইয়াৰ উপৰিও চুলিৰ গুৰিৰ তেলগ্ৰন্থিৰ কাৰ্য্যক্ষমতা অটুট ৰখাত সহায় কৰে। কোষ বিভাজন, প্ৰটিন সংশ্লেষণ, ৰোগ প্ৰতিৰোধ ক্ষমতাৰ কাৰ্য্যকে ধৰি শৰীৰৰ বহুতো গুৰুত্বপূৰ্ণ কামত জিংক জড়িত হৈ থাকে, যিয়ে চুলিৰ স্বাস্থ্যৰ ওপৰত পৰোক্ষভাৱে প্ৰভাৱ পেলায়। জিংকৰ অভাৱে চুলিৰ বৃদ্ধি লেহেমীয়া কৰিব পাৰে, চুলি শুকান আৰু ৰুক্ষ কৰি তুলিব পাৰে, চুলি সৰা বৃদ্ধি কৰিব পাৰে।
