যোৱা প্ৰায় পোন্ধৰতা বছৰত তথাকথিত দক্ষ মন্ত্ৰীৰ অধীনত থকা ৰাজ্যৰ স্বাস্থ্য বিভাগটোৰ উন্নয়নৰ স্বৰূপ উদং খাইছে শেহতীয়াকৈ পোহৰলৈ অহা যোৰহাট চিকিৎসা মহাবিদ্যালয়ৰ বিগত ৯ দিনত ২০ জনকৈ নবজাতকে মৃত্যুৰ ঘটনাই।
তদুপৰি প্ৰসূতিৰ মৃত্যুৰ আন এক চাঞ্চল্যকৰ তথ্যই পোহৰলৈ আনিছে সফলতাৰ ঢাক-ঢোল কোবোৱা স্বাস্থ্য বিভাগৰ ফোঁপোলা স্বৰূপ।
এন এইচ আৰ এমৰ ৱেবছাইটত পোহৰলৈ আহিছে সেই তথ্য। চলিত বৰ্ষৰ যোৱা এপ্ৰিল মাহৰ পৰা আৰম্ভ কৰি ১০ নৱেম্বৰ অৰ্থাৎ কালিলৈকে ৰাজ্যত প্ৰসূতিৰ মৃত্যু ঘটিছে ৪৯০ গৰাকী। ইয়াৰে কাছাৰ জিলাত বিগত ৮ মাহত মৃত্যুক সাৱটি লৈছে ৮৯ গৰাকী প্ৰসূতিয়ে।
আনহাতে চৰকাৰী তথ্যৰ ওপৰত ভিত্তি কৰি প্ৰকাশ পোৱা অনুসৰিঃ- বৰপেটাত-২৯,বঙাইগাঁৱত-১৪,কাছাৰত-৮৯,চিৰাঙত-০২, দৰঙত-০৭,ধেমাজিত-০৭, ধুবুৰীত-৩২, ডিব্ৰুগড়ত-২৯, ডিমা-হাচাওত-০৩, গোৱালপাৰাত-১৭, গোলাঘাটত-০৮, হাইলাকান্দিত-১২, যোৰহাটত-১৩, কামৰূপ মহানগৰত -৭৫, কামৰূপ গ্ৰাম্য-০৯, কাৰ্বিআংলঙত-১২,কৰিমগঞ্জত-১৬,কোকৰাঝাৰত-১৪,লখিমপুৰত-০৪,মৰিগাঁৱত-০৮,নগাঁৱত-৩৪, নলবাৰীত-০৫,শিৱসাগৰত-০৪,শোণিতপুৰত-৩৭,তিনিচুকীয়াত-০৬ আৰু ওদালগুৰিত-০৪গৰাকী প্ৰসূতিৰ মৃত্যু হৈছে।
উপৰোক্ত ২৬ খন জিলাত ভুল চিকিৎসা, উন্নত চিকিৎসাৰ অভাৱ আৰু ভেজাল দৰব সেৱন কৰাৰ ফলত ৪৯০ গৰাকী প্ৰসূতি মাতৃয়ে অকাল মৃত্যুক আকোঁৱালি ল’ব লগা হৈছে বুলিও এক গুৰুতৰ অভিযোগ উঠিছে।
আনহাতে, ৰাজ্যত প্ৰসূতিৰ মৃত্যুৰ হাৰ প্ৰতিমাহে যদি চাওঁ তেন্তে আমি দেখা পাম যে, যোৱা এপ্ৰিলত-৫৭ গৰাকী, মে’ত-৭০ গৰাকী, জুনত-৭৪ গৰাকী, জুলাইত-৬৭ গৰাকী, আগষ্টত-৬৫ গৰাকী, ছেপ্টেম্বৰত-৭৮ গৰাকী, অক্টোবৰত-৬৯ গৰাকী, আৰু নৱেম্বৰত-১০ গৰাকী প্ৰসূতি মাতৃৰ মৃত্যু ঘটিছে।
উপৰোক্ত তালিকাখন মন কৰিলে দেখা পাম যে চলিত বৰ্ষৰ জুন মাহত প্ৰসূতিৰ মৃত্যুৰ হাৰ সৰ্বাধিক। দুৰ্ভাগ্যজনকভাৱে, ৰাজ্যখনত প্ৰসূতিৰ মৃত্যুৰ হাৰ বৃদ্ধি হৈয়ে আছে। তদুপৰি তথ্যত প্ৰকাশ পোৱা অনুসৰি ৰাজ্যত প্ৰতিমাহে গড়ে ৭৬ গৰাকী প্ৰসূতিয়ে মৃত্যুক সাৱটি লয়।
উল্লেখ্য যে প্ৰসূতিৰ মৃত্যুৰ সমান্তৰালকৈ পোহৰলৈ আহিছে নৱজাতকৰ মৃত্যুৰ সংখ্যা। ইতিমধ্যে বিগত ৮ মাহত ৩৩৫৭ টা নৱজাতকে মৃত্যুক সাবটি লৈছে।
আনহাতে, এনআৰএইচএমত প্ৰকাশ পোৱা এই উদ্বেগজনক তথ্যৰ পাছতেই নৰ্থ ইষ্ট নাওৰ আগত প্ৰতিক্ৰিয়া প্ৰকাশ কৰিছে ভেজাল দৰৱ কেলেংকাৰিৰ বিৰুদ্ধে দীৰ্ঘদিন ধৰি মাত মাতি অহা দুৰ্নীতি বিৰোধী যুৱ শক্তি অসমৰ সভাপতি ধৰ্মকান্ত গগৈয়ে ।
তেওঁ কয়, “সৰ্বাধিক হাৰত প্ৰসূতিৰ মৃত্যুৰ মূল কাৰণেই হৈছে-এন এইচ এম।এই ৰাষ্ট্ৰীয় স্বাস্থ্য মিছনৰ জৰিয়তে শিশু আৰু প্ৰসূতিক নিম্নমানৰ ভিটামিন,দৰৱ খুওৱাৰ ফলত-নৱজাতক শিশুৰ যি ধৰণেৰে শ্ৰী বৃদ্ধি হ’ব লাগে নহয় আৰু প্ৰসৱকালীন মৃত্যু সংখ্যা বৃদ্ধি পায়। দ্বিতীয়তে চৰকাৰী চিকিৎসালয় সমূহত পৰ্যাপ্ত চিকিৎসক,নাৰ্ছ, চিকিৎসা সামগ্ৰীৰ অভাৱৰ লগতে সু-ব্যৱস্থা নথকাটো। শিশু আৰু প্ৰসূতিৰ সুৰক্ষাৰ বাবে ৰাজ্যখনত কোনো বিশেষ ব্যৱস্থা নাই।”
দুৰ্নীতি বিৰোধী যুৱ শক্তি অসমৰ সভাপতিগৰাকীয়ে এই মৃত্যুৰ হাৰ বাঢ়ি যোৱা বিষয়টোৰ এক উচ্চস্তৰীয় তদন্তৰ দাবী কৰে।
